КъБР-м и Парламентым и УнафэщI Егоровэ Татьянэ иригъэкIуэкIащ республикэм и хабзэубзыху орган нэхъыщхьэм и зи чэзу зэIущIэ.
«КъБР-м и Къэрал саугъэтхэм я IуэхукIэ» КъБР-м и Законым и 31-нэ статьям зэхъуэкIыныгъэ хэлъхьэным теухуауэ» законопроектым хэплъащ депутатхэр. Хабзэубзыху органым ар иригъэхьат КъБР-м и Iэтащхьэ КIуэкIуэ Казбек.
КъБР-м и Парламентым хабзэр убзыхунымрэ щIыпIэ самоуправленэм и IуэхухэмкIэ и комитетым и унафэщI Мэлбахъуэ Борис зэрыжиIамкIэ, республикэм щыпсэу бынунагъуэшхуэхэм зыщIагъакъуэу ират «Анэм и щIыхь» медалым пэкIуэу ират саугъэтым хуэдищкIэ хагъэхъуэнущ.
- Хабзэм ипкъ иткIэ, «Анэм и щIыхь» медалыр зыхуагъэфэща, бынитху тэмэму зыпIа (зыпI) анэм сом мин 50 кърат. Апхуэдэ саугъэт зыхуагъэувауэ быних е нэхъыбэ зыпI анэм сом мин 50-м худыщIагъу зы быным хуэзэу сом мини 10. Унафэм зэхъуэкIыныгъэхэр хэтлъхьэмэ, бынитху зыпIым сом мини 150-рэ иратынущ, бынитху е нэхъыбэ зиIэхэм а сом мини 150-м еханэ, ебланэ бынхэм папщIэ дэтхэнэми сом мин 30 хуэзэу къыхущIагъунущ. Мы щIыналъэ унафэр гъэзэщIэным республикэм и бюджетым щыщу сом мелуани 2,1-рэ мы гъэм, сом мелуани 3,15-рэ къыкIэлъыкIуэ илъэсхэм текIуэдэнущ, - къыхигъэщащ Мэлбахъуэм.
КъБР-м и Парламентым мы Iуэхур икIэщIыпIэкIэ зэфIигъэкIынущ, адрей псоми япэ иригъэщу. Абы теухуауэ гу зылъытапхъэхэм, зэхъуэкIыныгъэхэм, я Iуэху еплъыкIэ-хэм дыгъэгъазэм и 15 пщIондэ комитетым щыхэплъэ- нущ.
КъищынэмыщIауэ, депутатхэр хэплъащ хабзэр къызэпамыудыным, къэралым кинематографие IэнатIэм зыщIигъэкъуэным, жылагъуэ Iуэхухэр гъэзэщIэным теухуауэ УФ-м и унафэхэм зэхъуэкIыныгъэ хэлъхьэным и проектхэм.
КIэрыхубжьэрыху ткIуаткIуэхэм зэрелэжьыж Iэмалхэр егъэфIэкIуэным теухуауэ Тэтэрстан Республикэм и Къэрал Советым УФ-м и Къэрал Думэм и УнафэщI Володин В. зэрызыхуигъазэр даIыгъащ Президиумым хэтхэм. КъищынэмыщIауэ, унэтIыныгъэ зэмылIэужьыгъуэхэм ехъулIэныгъэфIхэр къыщызыгъэлъэгъуа лэжьакIуэхэр КъБР-м и Парламентым и щIыхь тхылъхэмкIэ ягъэлъэпIэну унафэ къызэдащтащ.
КъБР-м и Парламентым и пресс-IуэхущIапIэ.