Тэрч къалэм ЩэнхабзэмкIэ унэм иджыблагъэ щекIуэкIащ «Сабийхэр фIым я сурэтыщIщ» фIэщыгъэр зиIэ щIалэгъуалэ форум. Ар къызэригъэпэщат Налшык къалэ администрацэм щIыпIэ политикэмкIэ и управленэм и IэщIагъэлI Шыпш Аслъэн.
Аслъэн илъэс зыбжанэ ипэкIэ къыхилъхьауэ «Правовая республика» фIэщыгъэр иIэу ди щIыналъэм щигъэлажьэ проектым мы гъэм хиубыдащ Тэрч районым ит курыт еджапIэхэри. Мазаем и пэм къыщыщIэдзауэ гъатхэпэм и кIэ хъуху ар ядэлэжьащ школым щIэс еджакIуэхэм. Мурад нэхъыщхьэу иIар къыдэкIуэтей щIэблэм къэралым къигъэув мардэхэм тету щэнхабзэ, хабзэ и лъэныкъуэкIэ гъэсэныгъэ етынырщ, я хуитыныгъэр здынэсыр ящIэу, къэралым и хабзэхэм къемызэгъ ямылэжьу къэгъэтэджынырщ. Псалъэмакъ ядригъэкIуэкIам къыщымынэу, абы еджакIуэ цIыкIухэр IуэхуфI куэдым хуиущиящ икIи тригъэгушхуащ, гъащIэм къыщыхъухэм я щапхъэхэр я пащхьэ ирилъхьэкIэрэ я дуней еплъыкIэм зытIэкIукIэ нэхъ мыхъуми зригъэхъуэжащ. МазитIкIэ иригъэкIуэкIа лэжьыгъэщ форумыр къызэгъэпэщы-ным лъабжьэ хуэхъуари. Къыхэгъэщыпхъэщ мыр а унэтIыныгъэмкIэ япэ зэхуэсу зэрыщытри.
ЩэнхабзэмкIэ унэм и пэIущIэ пэшым деж къыщызэрагъэпэщат щIыналъэм ит курыт еджапIэхэм ягъэхьэзыра гъэлъэгъуэныгъэр. Абдеж щыплъагъурт школхэм унэтIыныгъэ зэмылIэужьыгъуэхэмкIэ зыIэрагъэхьа ехъулIэныгъэхэр, абыхэм щеджэ IэпэIэсэ цIыкIухэм я IэдакъэщIэкIхэр. ЗэIущIэм къеблэгъа хьэщIэхэм япэщIыкIэ пэIущIэ пэшым зыщаплъыхьащ, плIанэпэ къэскIэ бгъэдыхьэурэ еджакIуэ цIыкIухэм жаIэхэм щIэдэIуащ.
Гъэлъэгъуэныгъэр зэфIэкIа нэужь хьэщIэхэри хэгъэрейхэри еблэгъащ Iуэхур щекIуэкIыну пэшым. Пшыхьыр къыщызэIуихым Шыпш Аслъэн жиIащ:
- Нэм илъагъумрэ тхьэкIумэм зэхихымрэ гур ягъэхуабэ. ФIыщIэ фхузощI си Iуэхур къыздэзыIэта, къыздэзыгъэпсынщIа дэтхэнэми. Мы форумым и къалэн нэхъыщхьэр еджакIуэ цIыкIухэр IуэхуфIхэм тегъэгушхуэнырт, утыку езыр-езыру къигъэхьэныр арати, ар къыдэхъулIауэ жыпIэ хъунущ. Дунейм щыдлэжьу хъуар щIэтщIэр къыдэкIуэтей щIэблэращи, Тхьэм дыхущIигъэхьэ!
Апхуэдэу къызэхуэсахэм Аслъэн яжриIэжащ Тэрч щIыналъэм курыт еджапIэу итым зэреблэгъар, иригъэкIуэкIа псалъэмакъхэр, абыхэм кърикIуахэр. Иужьым къеблэгъа хьэщIэ лъапIэхэр яригъэцIыхуащ. КъэпщытакIуэу къригъэблэгъахэм ящыщт Тэрч щIыналъэ администарцэм и Iэтащхьэ Дадэ МуIаед, Урысейм и юристхэм я зэгухьэныгъэм и къудамэу КъБР-м щыIэм и унафэщI Целоусовэ Аннэ, КъБКъУ-м къэхутэныгъэ лэжьыгъэхэмкIэ и проректор, химие щIэныгъэхэм я доктор Хьэшыр Светланэ, Налшык къалэ ЗАГС-м и унафэщI Шэрий Валентинэ, КъБКъУ-м и лэжьакIуэ, медицинэ щIэныгъэхэм я доктор Инаро-къуэ Аллэ, 2008 гъэм Пекин щекIуэкIа Олимп Джэгухэм я чемпион Хъущт Аслъэнбэч, КъБКъУ-м правэмкIэ, экономикэмрэ финансхэмкIэ и институтым и унафэщI ГъукIэпщокъуэ Мурат, уэрэджыIакIуэ цIэрыIуэ Текуев Амур, Урысейм и журналист зэгухьэныгъэм хэт, теленэтынхэр езыгъэкIуэкI Аттаев Азнор, Налшык къалэ щIыпIэ самоуправленэмкIэ и советым и депутат Лу Азэмэт, «КонсультантПлюс:КБР» компанием и унафэщI Нэгъуей Мухьэдин сымэ. Абыхэм нэмыщI Iуэхум я гуащIэ халъхьэну къекIуэлIат IэнатIэ зэмылIэужьыгъуэхэмкIэ пэрыт IэщIагъэлIхэри.
Япэу псалъэ зрата Дадэ МуIэед жиIащ:
- Къыхэгъэщыпхъэщ мыпхуэдэ Iуэху япэу ди щIыналъэм зэрыщекIуэкIыр. Абы ипкъ иткIэ мащIэу дыгузэвами, иджыпсту дызыхуэкIуар щытлъагъукIэ дымыгушхуэнкIэ Iэмал иIэкъым. КъэкIуэнур зэлъытар къыдэкIуэтей ди бынхэращ, нобэ абы яхэтлъхьэращ дгъуэтыжынури. Иджыри къэс екIуэкIа лэжьыгъэм къигъэлъэгъуащ Iэмалу диIэр къэдгъэсэбэпрэ, нэхъыфIу щыIэр ябгъэдэтлъхьэмэ, удз гъэгъам хуэдэу, ди сабийхэм зыкъызэрызэкъуахынур.
Сабийхэм я жыIэхэри гупсысэхэри Iуэхум къыхэлъыта хъун папщIэ мыпхуэдэ зэхуэсхэр нэхъыбэрэ ирагъэкIуэкIмэ, абы сэбэпынагъыу къихьынуми тепсэлъыхьащ. Лэжьыгъэр къызэгъэпэщыным зи гуащIэ хэлъ дэтхэнэми фIыщIэ яхуищIри, абы мы проектыр зи IэдакъэщIэкI, Тэрч районым ис еджакIуэхэм емызэшыжу ядэлэжьа Шыпш Аслъэн Тэрч къалэ администрацэм къыбгъэдэкI ЩIыхь тхылъыр иритащ.
КъэпщытакIуэхэр я гъащIэ гъуэгуанэм зыщыхуэза лъэпощхьэпохэм, абыхэм хэкIыпIэ къызэрыхуагъуэтам, дэIэпыкъуэгъу къахуэхъуахэм, нобэкIэ зыIэрагъэхьа ехъулIэныгъэхэм яхутепсэлъыхьыжащ сабийхэм. Езы еджакIуэ цIыкIухэми яфIэгъэщIэгъуэнхэм теухуа упщIэхэри ятащ. Пленарнэ Iыхьэр зэфIэкIа нэужь, абыхэм адэ-кIи Iэмал яIащ хьэщIэхэр нэхъ гъунэгъуу зрагъэцIыхуну, я лэжьыгъэм и щэхухэмкIэ япкърыупщIыхьыну. Абы папщIэ къызэрагъэпэщат секцэ зэхуэмыдэхэр. Ахэр: журналистикэ, правэмрэ политикэмрэ, естественнэ щIэныгъэхэр, медицинэ, спорт, щэнхабзэмрэ гъуазджэмрэ, экономикэ. Дэтхэнэ унэтIыныгъэми узытепслъэхьын- рэ узыщIэупщIэ хъун куэдрэ хэлъу апхуэ-дэт. Зэманыр къаймэщIэкI пэтми, еджакIуэхэм Iэмал яIащ зыщIэхъуэпс IэщIагъэхэм я щэхухэр къащIэну, зыхуей лъагапIэм нэсын папщIэ къахуэсэбэпыну чэнджэщ-хэм щIэдэIуну. Форумым хэта дэтхэнэми я нэгухэм гушхуэныгъэр къищу, екIуэкIа Iуэхум гукъыдэжрэ дэрэжэгъуэрэ къазэрыритар плъагъуу зэбгрыкIыжахэщ.