Окъуучула парламентибизни ишин иги ангылагъанларын кёргюзтгендиле

 Республиканы школларыны 5-11-чи классларыны 80-нге жууукъ  окъуучусу тюнене КъМР-ни Парламентине чакъырылгъандыла. Ала законла чыгъарыучу органны 25-жыллыгъына бардырылгъан конкурслада хорлагъан жашла бла къызладыла. Аланы алгъышларгъа эмда дипломларын берирге Парламентни спикери Татьяна Егорова, аны орунбасары Михаил Афашагов, Билим бериу, илму эм жаш тёлю политика жаны бла комитетни башчысы Светлана Азикова бла аны келечиси Надежда Киреева да келген эдиле. 
Къууанчлы жыйылыуну ача, Светлана Азикова конкурсланы юслеринден билдиргенди. «Мен Ата журтуму сюеме» деген номинацияда эришиулеге республиканы эллеринден бла шахарларындан 120 окъуучу къатышхандыла. Аладан а 43 айырмалы сайланнганды. Конкурс кеси да бир ненча бёлюмге юлешиннгенди: окъуучуланы битеулю эм энчи хазырлыкълары сюзюлгенди, ана тилде назмуланы къалай айтханларына къаралгъанды эмда жаш адамла кеслери жазгъан назмуланы да кёргюзтгендиле. 
«Мурдорлу закон: сабийлени сейирлери» деген республикалы конкрусха уа 63 иш берилгенди, аладан 13-сю сайланнганды. «Закон эм право» эришиуледе кеслерини сынауларын 100 окъуучу кёргюзтюп, хорлагъанланы санына 18 адам чыкъгъандыла. Светлана Гаднановна билдиргенича, бу эришиуле жыл санлагъа юлешинип бардырылгъандыла.  
Сабий чыгъармачылыкъны «Кюн шахар» академиясында уа мартда «Инсанны эм адамны эркинликлери бла праволары» деген команда оюн къуралгъанды. Анга да 50 школчу къатышханды. 

Жыйылгъанланы Татьяна Егорова да алгъышлагъанды. Ол а  конкурсха кёп иш кёргюзтюлгенин, айырмалылагъа уллу конкуренциягъа чыдаргъа тюшгенин чертгенди. «Мен эришиулеге къатышханлагъа барысына да тириликлери, бу темагъа сейирлери ючюн ыразылыгъымы айтыргъа сюеме.  Конкурсла уа сизни чыгъармачылыкъ фахмугъузну ачыкълар мурат бла къуралгъандыла да, аладан кесигизге жангы билим, сынау алгъан эсегиз, ол бек аламатды»,-дегенди ол.
Спикер конкурсантла законла чыгъарыучу органны иши бла терен шагъырей болгъанлары алагъа хайыр келтирлигине ышаннганын да айтханды. Ол айырмалылагъа  жангы жетишимле да тежегенди: «Бирлени бу биринчи хорламларыды, кезиулю кере белгиленнгенле да болурла. Алай сизни барыгъызны да чыгъармачылыкъ фахмугъуз,  тирилигиз бирикдиргендиле».  
Ызы бла саугъалау башланнганды. Алай бла «Мен Ата журтуму сюеме» конкурсда гран-при Бахсан районну Жанхотия элини школуну 8-чи классыны окъуучусу Жаппуланы Лейлягъа берилгенди. Аны ариу ауазын энтта эшитирге сюйюп, жыйылыугъа къатышханла назму айтырын тилегендиле. Лейля уа Къулийланы Къайсынны чыгъармасын шатык айтып, къарслагъа тийишли болгъанды. 
Бу конкурс а бир ненча бёлюмден къуралгъанды. Алада хорлагъанланы арасында Огъары Малкъардан Улбашланы Жаннета (1-чи жер), Муртазланы Саида (3-чю жер) да бардыла. Нальчикни 13-чю, 14-чю гимназияларыны, 5-чи, 9-чу, 17-чи номерли школларыны окъуучулары  Жанатайланы Артур (2-чи жер), Гергъокъланы Алихан (2-чи жер), Ботталаны Элина (3-чю жер), Жылкъыбайланы Жамиля (1-чи жер), Байсыланы Амина (3-чю жер), Къалабекланы Залина (3-чю жер)  саугъаланнгандыла.  
«Эрудит» араны окъуучусу Трамланы Лейля (2-чи жер), Тырныауузну 6-чы школну окъуучулары Байрамукъланы Милена (1-чи жер) бла Байсолтанланы Муса (3-чю жер) да белгиленнгендиле. 
«Мурдорлу закон: сабийлени сейирлери» деген номинацияда уа Элбрус районну Нейтрино элини школуну 10-чу классыны окъуучусу Балаланы Мурат бла Нальчикни 9-чу номерли школуну 8-чи классыны окъуучусу Балаланы Омар да ючюнчю жерге чыкъгъандыла. 
«Инсанны эм адамны эркинликлери бла праволары» деген  оюнда биринчи жерге Нальчикни 6-чы школуну «Депутатла», экинчи - «Кюн шахарны» «Парламентарий», ючюнчю да  Нальчикни 2-чи номерли лицейини «Фемиданы болушлукъчулары» командалары  чыкъгъандыла.   Андан сора да, суратланы «Закон эм право» бёлюмюнде айырмалыла да белгили болгъандыла. 
Ахырында уа окъуучуланы хазырлагъанлары ючюн «Кюн шахар» академияны устазлары Елена Безрокова, Беккиланы Жаннета, Наталья Гашокова эм Рустам Маиров КъМР-ни Парламентини Председателини Ыспас къагъыты бла саугъаланнгандыла.

 

Абдуллахланы Фатима.

Поделиться:

ЧИТАТЬ ТАКЖЕ:

29.03.2024 - 09:05

БАХЧАЛАНЫ БУЗДАН КЪОРУУЛАРГЪА – 40 МИЛЛИОН СОМ

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю.

29.03.2024 - 09:04

КАРТОФДАН БАЙ ТИРЛИК КЪУУАНДЫРАДЫ

Шимал-Кавказстатны управлениясындан  билдиргенлерича, былтыр Къабарты-Малкъарны  мюлклерини барысында да картофдан  154,6 минг тонна  жыйылгъанды.  Ол былтырдан 1,8 процентге кёпдю.

29.03.2024 - 09:04

ТАНГ КЕСЕК КОНСЕРВА ЧЫГЪАРЫЛАДЫ

Къабарты-Малкъар тахта кёгетледен консервала жарашдырыу бла эки жылны ичинде алчы жерни алады. Ол санда былтыр, 363,8 миллион банка чыгъарылгъанды.

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.