Николай Хабаров - Къабарты-Малкъарны прокурору

КъМР-ни надзор органыны башчысына Николай Хабаров тийишли кёрюлгенди. Аны кандидатурасы тюнене  Парламентни кезиулю жыйылыуунда къабыл этилгенди. Битеу да бирге уа депутатла 10-дан аслам соруугъа къарагъандыла, ол санда бюджетге тюзетиулени да сюзгендиле. Кенгешни спикер Татьяна Егорова бардыргъанды.
Жыйылыугъа КъМР-ни Башчысыны къуллугъун болжаллы халда толтургъан Казбек Коков, РФ-ни Баш прокуратурасыны Шимал-Кавказ федерал округда Управлениясыны таматасы Александр Семёнов, баш федерал инспектор Евгений Ткачёв, РФ-ни  Федерал Жыйылыууну Федерация Советинде КъМР-ни келечиси Улбашланы Мухарбий, КъМР-ни Конституция сюдюню председатели Геляхланы Абдуллах эм башхала  къатышхандыла.
Биринчиден, Татьяна Егорова,  Владимир Маировха депутат мандат берилгенин билдирип, аны алгъышлагъанды. Повесткагъа тюрлениуле кийиргенден сора, депутатла законопроектлени сюзюуге киришгендиле.
Регионну прокуроруну кандидатурасын РФ-ни Баш прокуратурасы кёргюзтеди. «Аны субъектни оноучусу, законла чыгъарыучу органны оюмун эсге алып, къабыл кёреди. Парламентге Казбек Коковдан аны юсюнден  письмо келгенди»,-дегенди Татьяна Борисовна.
 Александр Семенов, депутатланы Николай Хабаров бла шагъырей эте, ол юстицияны 3-чю ранглы къырал кенгешчиси болгъанын, надзор органда 1994 жылдан бери ишлегенин билдиргенди. «Псков областьда район   следовательден регионну прокуроруна дери ёсгенди. Аны Кавказда къуллукъ этиу жаны бла  сынауу да барды – Чечен Республикада ишлегенди. Николай Алексеевич кесин билимли, жууаплы оноучуча белгили этгенди. Ол РФ-ни Президенти салгъан борчланы, адамны праволарын сакълау ишни бет жарыкълы толтургъанды. Аны сынауу Къабарты-Малкъарны прокуратурасыны ишин бийик даражада къураргъа онг берлигине ишексизме»,-дегенди.

Ызы бла Николай Хабаров кеси сёлешгенди. Ол  кавказ халкъланы миллет   адетлерине хурмет этгенин чертгенди. «Мен регионнга 2007 жылда келгенме, аны энчиликлерин, культурасын сюйгенме. Республикада законлукъну жалчытыр, къыралны оноучуларыны буйрукъларын толтурур ючюн билимими аямай ишлерге хазырма»,-дегенди ол.
Жашырын къол кётюрюу бардырылып, депутатла барысы да аны республиканы прокуроруну къуллугъуна тийишли кёргендиле. 
Депутатлагъа ыразылыгъын айта, Казбек Коков Николай Хабаровну сынауу, билими да Россейни, республиканы айнытыугъа себеплик этеригине ийнаннганын айтханды. Дагъыда ол жыйылгъанланы Россейни парламентаризмини кюню бла да алгъышлагъанды.
Ол кюн кенгешге КъМР-ни алгъыннгы прокурору Олег Жариков да чакъырылгъан эди. Татьяна Егорова аны Къарачай-Черкесни прокуроруна тийишли кёрюлгени бла алгъышлап, жангы жерде жетишимле тежегенди. Алгъышлаулагъа Казбек Коков да къошулгъанды.
Олег Олегович а 12 жыл мындан алгъа къуллугъуна кирише, республиканы Парламентини депутатларыны аллында сёлешгенин, аланы насийхатларына тынгылагъанын эсгергенди. «Бу жылланы ичинде мен борчуму кертилик бла толтурургъа кюрешгенме»,-деп ыразылыгъын билдиргенди. 
Ызы бла депутатла законланы проектлерин сюзгендиле. КъМР-ни Баш сюдюню кёргюзтюую бла Майя Гонгапшева, Алимбек Хуштов эм Ислам Шогенов Зольск, Терек эм Урван сюд районланы 1-чи номерли участкаларыны жарашдырыучу судьяларына тийишли кёрюлгендиле. Баш сюдню таматасы Юрий Маиров аланы ишчи сынауларыны, билимлерини юслеринден хапар билдиргенди. 
КъМР-ни Айырыу комиссиясы бош болгъан депутат мандатны Владимир Маировха бергенди. Регламент, депутат этика эм Парламентни ишин къурау жаны бла комитетни башчысы  Кансаланы Еленаны  айтханына кёре, аны тилегени бла ол  Социал политика, урунуу эм саулукъ сакълау эмда Аграр политика, экология, табийгъатны хайырланыу эм жер бла байламлы халла жаны бла комитетлеге кийирледи.  
«КъМР-де Сабийни эркинликлери жаны бла уполномоченныйни юсюнден» закон экинчи окъулууда къабыл кёрюлгенди. Социал  политика, урунуу эм саулукъ сакълау комитетни башчысы Хусейн Кажаров документде уполномоченныйни ишини низамы, аны полномочиялары да белгиленнгенлерин айтханды. 
Депутатла республикалы бюджетге кёргюзтюлген тюзетиулеге да къарагъандыла. КъМР-ни финансла министрини къуллугъун толтургъан Елена Лисунну айтханына кёре, ала налог эм андан тышында фондладан тюшген ахчаны ёлчеми прогноздан 249,6 миллион сомгъа кёп болгъаны бла байламлыдыла. Андан сора да, федерал бюджетден трансферт халда 238,1 миллион сом берилгенди. Алай бла бюджетни файдаларына тюзетиуле кийирилип, аны ёлчеми 34 миллиард 695,4 миллион сомгъа жетгенди. Аны 11 миллиард 674,3 миллион сом налог эм андан тышында фондладан тюшгенди.  Алайлай  берилген ахча  ёлчеми 23 миллиард 21 миллион сом болгъанды.  
Къоранчла уа 34 миллиард 412,5 миллион сомгъа жетгендиле. Бюджет профицит бла толтурулады. Налогладан тюшген артыкъ ахча  банк кредитлени эм къырал борчну тёлерге бёлюнедиле. Ол а 10 миллиард 39,8 миллион сомгъа дери азайтылгъанды. 
«КъМР-де индустрия (промышленный) паркланы юслеринден» республикалы законнга тюзетиуле 1-чи эм 2-чи окъулууда къабыл кёрюлгендиле. Экономиканы айнытыу министр Рахайланы Борисни айтханына кёре, документ республиканы инвестициялагъа бютюн уллу  онгла къураргъа  себеплик этерикди. 
«КъМР-де билим бериуню юсюнден» законну 5-чи статьясына кёргюзтюлген тюзетиуле бла уа жыйылгъанланы жарыкъландырыу, илму эм жаш тёлюню ишлери жаны бла министр Ауэс Кумыков шагъырей этгенди. Аны айтханына кёре, документде Бир къырал экзаменни кезиуюнде ишлеген устазлагъа хакъларын тёлюуню низамы шарт тохташдырылгъанды. 
Кенгешде башха законланы проектлерине да къаралгъанды. Ахырында Татьяна Егорова депутатланы жууукълаша келген байрамла бла алгъышалгъанды эмда Хорламны кюнюню аллында ветеранланы жокъларгъа чакъыргъанды.

 

Тикаланы Фатима.

Поделиться:

ЧИТАТЬ ТАКЖЕ:

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.

28.03.2024 - 09:03

ИНВЕСТИЦИЯЛАГЪА – ЭНЧИ ЭС

Жангы предприятияла къурарча, производствону кенгертирча, инвестицияла этмей, башхача айтханда ишге ахча салмай боллукъ тюйюлдю.

27.03.2024 - 14:04

КЪАБАРТЫ-МАЛКЪАР РЕСПУБЛИКАНЫ БАШЧЫСЫ К.В.КОКОВНУ РОССЕЙ ФЕДЕРАЦИЯНЫ МИЛЛЕТ ГВАРДИЯСЫНЫ АСКЕРЛЕРИНИ КЮНЮ БЛА АЛГЪЫШЛАУУ

Росгвардияны Къабарты-Малкъар Республикада Управлениясыны хурметли аскерчилери, ишчилери эмда ветеранлары! Сизни Россей Федерацияны Миллет гвардиясыны аскерлерини кюню бла алгъышлайма!

27.03.2024 - 09:07

САКЪАТ САБИЙЛЕ ОКЪУУСУЗ КЪАЛМАЗЧА

Къабарты-Малкъарны Жамауат палатасында республиканы билим бериу учреждениялада сакъат эм къыйын ауругъан сабийлени окъутуу не халда болгъаны тинтилгенди.