КъМР-ни Башчысы Казбек Коков видеосвязь амал бла стратегиялы сессияны ишине къатышханды, аны Россей Федерацияны Правительствосуну Председателини орунбасары Марат Хуснуллин «Сколково» инновация араны мурдорунда бардыргъанды, деп билдиреди КъМР-ни Башчысыны бла Правительствосуну пресс-службасы. 

Марат Хуснуллин жыйылыугъа къатышханлагъа къурулуш эм жашау журт-коммунал мюлк  бёлюмню 2030 жылгъа дери айнытыу бла байламлы стратегияны кёргюзтгенди. Ол къыралны оноучулары салгъан борчлагъа, тюрлю-тюрлю бёлюмледе специалистле жыйгъан аналитика билдириулеге эм регионла кёргюзтген предложениялагъа кёре къуралгъанды.
Сессияда миллет проектле къалай бардырылгъанларына, бек алгъа  жашау журтланы ишленнгенлерине эм аланы тёгереклерин тапландырыу не халда болгъанына къарагъандыла.
Регионланы таматаларына ала оноу этген жерлени комплексли айнытыу къалай боллугъуна эс бургъандыла.РФ-ни Правительствосуну вице-премьери жерлени айнытыуда планланы тынгылы жарашдырыргъа, шёндюгюлю цифралы технологияланы сингдирирге, къурулуш бёлюмде тыш къыралладан келтирилген керек затланы кесибизникиле бла алышындырыргъа кереклисин айтханды.  
Казбек Коков сессияны итогларына кёре, къурулуш бёлюмде эм жашау журт-коммунал мюлкде алыннган стратегия регионланы ишлеринде магъаналы документледен бири боллукъду дегенди.
«Бизни барыбызгъа да Россейни Президенти салгъан баш борчладан бири – адамланы жашауларыны болумларын игилендириудю. Бек ышанама, ол салыннган борчланы бла эм белгиленнген планланы бизни республика толтурлугъун», – деп чертгенди республиканы оноучусу.