Республика бла байламлы бир тюрлю уллу байрам да ат чаришсиз ётмегенин билебиз. Бу жолгъу юбилейде да спортну бу тюрлюсюн сюйгенлеге ахшы саугъа болгъанды. 
КъМР-ни Эл мюлк министерствосу къурагъан эришиулеге быйыл тыш къыраллы атчыла да къатышханларын белгилерчады. Бу жолгъу чаришлени саугъа фонду 3,5 миллион сом болгъанды. Ондан артыкъ чаришге бёлюннген ахчадан биришер миллиону «Президентни кубогуна» бла «Элбрусну кубогуна» кетгендиле. Къалгъаны уа бирси сермешледе хорлагъанланы араларында юлешиннгенди. 
Бу чаришлеге къараргъа республиканы Правительствосуну Председатели  Мусукланы Алий эм башха къуллукъчула да келгендиле. 
КъМР-ни Башчысыны саугъасына быйыл юч жылдан тамата атла эришгендиле. Аланы араларында хорламны Принц Роуздан сакълай эдиле да, аны ючюн жарсыгъанла муратларына жетгендиле. Ахшы хазырлыгъы болгъан ат, ызындан келгенледен иги да алгъа кетип, финишге алай жетгенди. Аны иеси Вячеслав Вороковду. Принц Роузну хорламгъа жокей Тимур Сижажев келтиргенди. Баш саугъаладан бирин да ала алгъандыла.
«Элбрусну кубогу» ючюн да юч жыллары толгъан атла чыкъгъан эдиле. Ала 2400 метрни къаты сермешде ётгендиле. Хорламны уа Чечен Республикадан Сулим Цыцаевни Акцент деген аты алгъанды. Саугъаладан а энтта да бири къоншу республикагъа кетгенди. Экижыллыкъланы араларында да ала кючлюрек эдиле. 
Чаришлеге келгенлени культураны ишчилери да кёллерин алгъандыла. Музыка театрны солисткасы Дина Белоцерковская, Ирина Даурова, Адыгеядан  Магомет Дзыбов эм башхала жыйылгъанланы кеслерини чыгъармачылыкълары бла къууандыргъандыла. 
Саулайда ол кюн 10 чариш болгъанды. Бек ахырында Нальчикни хурметине аталгъаны ётгенди. Анда атла 1600 метрде эришгендиле. Ол саугъаны да Чеченден  Саид Шаптукаевни Мамед деген аты къытханды. 
Ат чаришлени сезону жабылыргъа алай кёп къалмагъанды. 21 сентябрьде спортну бу тюрлюсюне сейирлери болгъанланы Нальчикни ипподрому сакълайды. 

Къасымланы Аминат.