Байрым кюнню ингиринде Нальчикде Жашил театрда КъМР-ни 100-жыллыгъына жораланнган уллу концерт озгъанды. Анга жамауат аслам халда келгенди эмда республиканы къууанчына сансыз болмагъанын ачыкълай, байрамны жаратханы да кёзге туура эди. Аны хурметли къонакълары уа КъМР-ни Парламентини Председатели Татьяна Егорова, РФ-ни Федерация Советинде келечиси Улбашланы Мухарбий, Правительствосуну Председателини орунбасары Марат Хубиев, маданият министри Мухадин Кумахов, бирсиле да болгъандыла.
Къонакъла барысы да бирден сахнагъа чыгъып, жыйылгъанланы уа Татьяна Борисовна алгъышлагъанды. Ол кесини сёзюнде республикабызгъа бир кере келип, аны табийгъатыны тамашалыгъын кёрген дагъыда къайтыргъа излемей къоймазлыгъын чертгенди. Къайсы биригиз да ишлеген, жашагъан жеригизде республикабызны айнырына, жашларына юлюшюгюзню къошасыз, аны ючюн да сау болугъуз деп, саулукъ-эсенлик, мамырлыкъ, монглукъ да тежегенди.
Концертни уа Б. Темирканов атлы къырал филармонияны симфония оркестри ачханды. Аладан сора да, ол кюн жамауат «Балкария», «Кабардинка». «Терк къазакъла», «Арабеск», «Амир», «Зори Кавказа», бирси ансамбльлени да жарыкъ тепсеулерин кёрюрге онг тапханды. Тепсеуню жыр алыша, сахнада КъМР-ни халкъ артистлери Текуланы Амур, Черим Нахушев, сыйлы артистлери Тимур Гуазов, Светлана Тхагалегова, бирсиле да халкъны концерт номерлери бла къууандыргъандыла. Амурну уа «Нальчик кечеле» деген жырны айтханына тынгылагъан бютюнда хычыуун эди.
Концертде дагъыда КъМР-ни Маданият министерствосу регионну жюзжыллыкъ юбилейине жоралап бардыргъан конкурс бла байламлы жазылгъан автор чыгъармаланы премьералары да болгъанды. Алай бла жангы жырларын ол ингирде Жаникаланы Элдар («Кабардино-Балкария»), Диана Тхакахова («Моя Земля»), Черим Нахушев («Моя республика») эшитдиргендиле.
Жаш тёлю уа, аладан сора да, Москвадан келген къонакъланы Доминик Джокер бла Мухтар Хардайны чыгъармачылыкъларын жаратханларын баямлай, жырчылагъа жарыкъ тюбегендиле. Ала да байрамгъа келгенлени алгъышлап, жарашыулукъ, ачыкъ ниетлилик тежегендиле.
Юч сагъатны ичинде баргъан концерт абаданлагъа, жаш адамлагъа да бирча сейир болгъанды. Жамауат, артистле да туугъан эмда ёсген журтларын багъалагъанларын, ол мындан арысында да айный барырын сюйгенлерин бирча ачыкълагъандыла.
Мокъаланы Зухура.
Суратланы Артур
вологиров алгъанды.
