НАЛЬЧИК – АРА ШАХАР ЭМ БЕЛГИЛИ КУРОРТКъабарты-Малкъарны ара шахары Нальчик Россейни ариу жерлеринден бириди. Аны да, хар бир журтнуча, кесини энчи тарыхы барды. Аны тегерегин къуршалгъан къаяла налгъа ушайдыла, былай аны ючюн аталгъанды дейдиле. Архивледе материаллагъа кёре, былайда жашау журтла бек биринчи 1822 (башха жерде 1818) жылда ишленип башлагъандыла. Генерал Ермоловну заманында былайда ишленнген аскер къаланы Кавказ линияны къурагъан аскер араладан бири этгендиле эм мында Россейни аскер бёлюмюн орнатхандыла. 1826 жылда ол аскерчилеге деп, килиса да ишленнгенди. 1858 жылда, орус-кавказ уруш бошалыргъа, окъуу реформала башланнгандыла. 1859 жылда, уставларына къол салынып, тау школланы ачаргъа буйрукъ чыкъгъанды. Бизде, Нальчикде, аллай школ 1860 жылда ачылгъанды. Анда хакъ бла окъуу тёрт жылны баргъанды. Биринчи жыл хазырланыу заман болгъанды. Къалгъан юч жылны ичинде уа сабийле динден, орус тилден, географиядан, тарыхдан, математикадан да башланнган билим алгъандыла. Тау школну бошагъанланы, андан ары окъуйбуз деселе, орус гимназияны тёртюнчю классына барыргъа онглары болгъанды. Ала дагъыда элледе башланнган классланы устазлары болургъа шагъат къагъытла да алгъандыла. Тау школда кеси заманыны бек билимли, бай да адамы, жамауат къуллукъчу Малкъарукъланы Докшуканы жашы Ислам (Дадаш) да окъугъанды. Артда, 1911 жылда, ол окъуу юйню мурдорунда реальный училище ачханларында, ары ахча къошханды, кеси хакъына анда таулу сабийлени окъутуп тургъанды. 1871 жылда бу аскер журтха слобода деген ат берилгенди, ол кеси да граждан оноугъа ётгенди эм Терк областьны Нальчик округуну арасы деп белгиленнгенди. Андан сора, тамам он жылдан, анда онюч кирпич, тытыр завод, тёрт гюрбежи, тёрт суу тирмен, жыйырма къонакъ юй, элли ууакъ тюкен бла ашхана ишлеп башлагъандыла. 1901 жылда мында беш мингден артыкъ адам жашагъанды. Слободада тау школ, училище, сюд, казначейство, телеграф, почта, полиция участок, больница, библиотека эм башха учрежденияла ачылгъандыла. 1915 жылгъа башында айтылгъан реальный училищеде 256 сабий окъугъанды. Слободаны ара орамына Воронцовская деп, жарым патчахны аты аталгъанды. Ол бусагъатдагъы Къабарты орамды. Аны эки жанында саман юйле сюелгендиле. Эки къатлы юйледен жаланда ючюсю болгъанды слободада – реальный училище, саудюгерчиле Шуйскийни бла Зипаловну юйлери. Базар майдан а бусагъатда кинотеатр «Победа» сюелген жерде эди. Алайда Грибоедов атлы орамгъа да Гитче Базар орам деп айтылгъанды. Къабарты орамны суугъа жууукъ жанында Ермолов атлы (Свободы), бери жанында уа Елизаветинская (Октябрьская, Нахушева), андан да бери ётсенг, Бульварная (Сталина, Шогенцукова), Большая Базарная (Пушкина), Степная (Ленина), Выгонная (Горького), Почтовая (Ногмова) орамла болгъандыла. 1917 жылдагъы Октябрь революциядан сора иели затла къыралны къолуна ётгендиле. 1918 жылда халкъ депутатланы биринчи съездлеринде Совет власть орналгъаны белгиленнгенди. Акъланы бла къызылланы араларында баргъан инсан уруш Нальчикни тийресинде да къаты баргъанды. 1920 жылда совет власть жангыдан орналгъанды. Слободада халкъ китапхана, педагогика эм медицина техникумла, сурат санатны музейи ачылгъандыла. Туризм айнып башлагъанды. Ачы-Къабакъгъа, Нальчик курорт жерге саналгъанда, андан арлакъгъа чыгъып, алайда биринчиледен болуп юй ишлеген инженер-технолог Пётр Павлович Долинскийни аты аталгъанды. Курорт ол юйден башланнганды дейдиле. 1924 жылда Трек кёлде электростанция ишленнгенди. 1930-чу жыллада уа консервный эм машинала ишлеучю заводла, кондитер фабрика, эт комбинат, сют завод, элеватор, ётмек завод да ишленнгендиле. Китап басма, радиостанция, коммунист эл мюлк школ, фельдшер-акушер школ, селекциялы станция, республикалы клиника больница, илму-излем институт, кинотеатр, Пионерлени юйю ачылгъандыла. 1935 жылда «Нальчик» атлы къонакъ юй ишленнгенди. 1937 жылда автобусла жюрюп башлагъандыла. Уллу Ата журт уруш башланнганда, Нальчикде онеки госпиталь ачылгъанды. Алада эки жюз бла жыйырма беш врач, жети жюз бла жарым медсестра бла фельдшер ишлегендиле. Ала онюч минг ауур жаралы солдатха къарагъандыла. Шахарда медсестраланы, къаячыланы, связистлени хазырлау да къаты баргъанды. 1944-1957 жыллада малкъар халкъ кёчгюнчюлюкде болгъанды. Ол андан къайтханлай, республиканы алдагъы аты да жерин тапханды. 1966 жылдан башлап, Нальчикде кёп къатлы юйлени ишлеуню планы баргъанды. Жангы промышленность биригиуле да ачылгъандыла. 1991 жылда уа жашагъан жерибизге Къабарты-Малкъар Республика деп аталгъанды. Бюгюн Нальчикде университетле, академия, башха окъуу юйле, сейирлик солуу парк, тёрт театр, музейле, «Балкария» бла «Кабардинка» тепсеу ансамбльле, къауум спорт школ, санаторийле, китапханала, басма органла, тюрлю-тюрлю тарых эсгертмеле бардыла. Къурулуш тохтамайды. Битеу дуниягъа белгили курорт шахар, республиканы экономика, административ эм культура арасы Нальчик кюнден-кюннге кенгере, жангыра, жашнай барады. Мусукаланы Сакинат.
Поделиться: ЧИТАТЬ ТАКЖЕ:
|