Битеуроссей халкъ фронтну Къабарты-Малкъарда бёлюмю, «Милосердие 07» жандауурлукъ фонд къарагъан сексеннге жууукъ саусуз сабийге бла ата-аналарына республиканы тамаша жерлерине жолоучулукъла къурайдыла.
Жай каникуллада чекленнген онглары болгъан балачыкъла арт-араны сюйюп жокълайдыла. Мында ала тюрлю-тюрлю усталыкълагъа юйренедиле, физкультура этедиле, маданият, сурат ишлеу кружоклагъа эм башхалагъа да жюрюйдюле. Аны бла бирге жамауатчыла алагъа республиканы табийгъатыны тамаша жерлерине жолоучулукъла да къурайдыла.
- Къабарты-Малкъар сейир табийгъаты бла белгилиди. Аны себепли кёп болмай Черек районда Европаны эм терен Чирик кёлюнде болгъанбыз. Сабийле, кёлню жаратханларындан сора да, аны юсюнден кёп сейир шартла, таурухла да эшитгендиле.
Сабийле Нальчикни тюрлю-тюрлю жерлеринде, ол санда курорт тийресинде да болгъандыла. Огъары Малкъарны, Гара сууланы таласын, Элбрусну, ол санда Азауну, Чегетни да бек жаратхандыла, Минги таугъа 3,5 минг метрге кётюрюлюрге онг тапхандыла.
Курданланы Сулейман
