Къабарты-Малкъарны Башчысыны къуллугъун болжаллы халда толтургъан Казбек Коков 4-6-чы апрельде Москваны тийресинде РФ-ни премьер-министри Дмитрий Медведевни башчылыгъы бла бардырылгъан «Миллет проектле – аланы жашауда бардырыуну кезиую» деген кенгешге къатышханды. Форумну мураты - миллет проектлени жашауда бардырыу жаны бла Россейни Президенти Владимир Путин салгъан борчланы толтурургъа регионлагъа болушлукъ этергеди. Сёз, ол санда, субъектледе проектле бла байламлы ишни къурауну, жангы май указлагъа кёре этиле тургъан тюрлениулени юслеринден халкъгъа хапар билдирип турууну, «Электрон бюджет» амалны хайырланыуну эмда аллай башха жумушланы юслеринден баргъанды. Экономиканы баш магъаналы бёлюмлеринде 2019 жылгъа белгиленнген кёрюмдюлеге жетиуню онгларына уа энчи эс бурулгъанды.

Сюзюуню эсеплерине кёре баш борчла белгиленнгендиле, Россейни Правительствосуна тийишли буйрукъла берилгендиле, ол санда миллет проектлени жашауда бардырыу бла байламлы оноуланы федерал даражада этерге, регионланы энчиликлерин эсге алыу бла подпунктла да жарашдырыргъа.

Кенгешни кезиуюнде 10 тюрлю темагъа «тёгерек столла» бардырылгъандыла. Казбек Коков энчи тийрелени айнытыуну юсюнден айтылгъан жыйылыугъа къатышханды. Андан сора да, Россейни Транспорт министерствосуну башчысы Евгений Дитрих РФ-ни субъектлерини оноучулары бла ишчи кенгеш бардыргъанды. Аны кезиуюнде «Къоркъуусуз эмда тынгылы автомобиль жолла» деген миллет проект къалай толтурулгъанына къаралгъанды. Федерал, регион власть органланы башчылары бла экспертле транспорт инфраструктураны объектлерин ишлеуню, жолланы игилендириуню, айнытыуну онгларын сюзгендиле.

Къабарты-Малкъар 11 миллет проектге къатышады. Алагъа кёре республикада 50 регион башламчылыкъ жашауда бардырылады. Ала быладыла: «Демография», «Саулукъ сакълау», «Билим бериу», «Жашау журтла эмда шахарда болум», «Экология», «Къоркъуусуз эмда тынгылы автомобиль жолла», «Урунууну къыйматлылыгъы эмда иш бла жалчытыугъа себеплик этиу», «Россей Федерацияда цифралы экономика», «Маданият», «Гитче эмда орта предпринимательство эмда энчи иш башлагъанлагъа тутхучлулукъ этиу «Халкъла аралы кооперация бла экспорт».

Быйыл миллет проектлени толтуруугъа республикада 5 миллиард 455 миллион сом бёлюнюрюкдю.