КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек Москва лэжьыгъэ IуэхукIэ щыIэу IущIащ ТАСС хъыбарегъащIэ агентствэм и генеральнэ директор Михайлов Сергей.

Щызэпсалъэм и гугъу ящIащ Кавказ Ищхъэрэм и хъыбарегъащIэ IэнатIэм и лэжьэкIэм, апхуэдэуи щIыналъэм щекIуэкI экономикэ, политикэ, жылагъуэ, щэнхабзэ, спорт Iуэхугъуэ нэхъыщхьэхэм, абыхэм Къэбэрдей-­Балъкъэр Республикэр къы­зэ­ры­зэ­ра­гъэпэщрэ илъэси 100 зэрырикъум зэ­рызыхуагъэхьэзырри яхэту, ятеухуа хъы­бархэр зэбгрегъэхыныр къызэгъэпэща зэрыхъу щIыкIэм.
«КъБР-м и экономикэ, туризм, щIэнхабзэ IэнатIэхэм зегъэужьынымкIэ лъабжьэфI щыIэщ. ТАСС-мрэ «Ар Кавказырщ» порталымрэ дяпэкIи тхузэ­фIэкI къэдгъэ­нэ­нукъым республикэм дежкIэ мыхьэнэшхуэ зиIэ проектхэм цIыхубэр щыгъуазэ щIы­нымкIэ, ди къэралми, нэгъуэщI хэкухэми щып­сэухэр фи щIыналъэм щыIэ рекреацэ Iэмалхэм, социально-экономикэ ехъулIэныгъэхэм, щэнхабзэ хъугъуэфIы­гъуэхэр зы­хуэдэр къедгъэщIэн, а псор къэзыгъэщI фи цIыхухэр къедгъэ­цIыхун папщIэ», - къыхигъэщащ Михайлов Сергей.
КIуэкIуэ Казбек жиIащ ТАСС-м и проектхэр Къэбэрдей-Балъкъэрым щып­сэухэм ягу зэрыдыхьэр икIи къэралым и хъыбарегъащIэ IуэхущIапIэ нэхъ ин ды­дэхэм ящыщ зым и унафэщIхэми журналистхэми фIы­щIэ яхуищIащ ди щIыналъэм теухуа хъыбархэр зэIу­хауэ икIи гулъытэшхуэ хуащIэу хэIущIыIу зэращIым ­папщIэ.