Республиканы Правительствосуну Председатели Мусукланы Алий бардыргъан кенгешде КъМР-ни быйылгъа эмда келир эки жылгъа бюджетини проектине кёргюзтюлген тюрлениуле сюзюлгендиле. Дагъыда башха ведомствола хазырлагъан бир ненча бегимни проектлерине къаралгъанды.
Республиканы финансла министрини къуллугъун толтургъан Елена Лисун айтханнга кёре, КъМР-ни бюджетинден къоранчла керекли жумушлагъа этилир ючюн тийишли законнга талай тюрлениу сингдирилирге керекди. «Сёз поставщиклеге аванс тёлеуню эмда кредит борчланы жабыуну, ала мындан арысында жыйылмазча мадар этиуню юсюнден барады», - дегенди ол. Тюзетиуле федерал норматив- праволу актлада тюрлениуле бла байламлыдыла.
Дагъыда къырал учреждениялагъа субсидияла бериу жорукъла да башхаракъ боллукъдула. Бу тюрлениу ала предприятиялагъа бла организациялагъа, энчи предпринимательлеге, коммерциялы болмагъан организациялагъа болушлукъ этгенлери бла байламлыды.
Ачыкъ акционер общество халда ишлеген «Къабарты-Малкъарны геология тинтиуле экспедициясыны» учрежденияны жабаргъа тюшгенди. КъМР-ни жер эм ырысхы бла байламлы халланы министрини къуллугъун толтургъан Уяналаны Таймураз билдиргенича, буруннгу жылдан бери геология тинтиу ишлени битеу тюрлюлери жаланда бир подрядчикге берилгендиле – «Росгеология» къырал корпорациягъа. Аны бла кёп предприятияла, ол санда бу экспедиция да, конкурслагъа къатышыргъа эркинликден къуру къалгъандыла. Ахча ишлерге башха амалы болмагъаны себепли аны жабаргъа оноу этилгенди, мюлкю уа республиканы иелигине кёчюрюллюкдю. Шёндю документле жарашдырыла турадыла.
Уяна улу дагъыда республиканы иелигинден Лескен районнга эки объект хакъсыз бериллигин билдиргенди. Сёз Ташлы-Талада бла Аргуданда биришер орта школну юсюнден барады.
Табийгъат байлыкъла эмда экология министр Шауаланы Илияс жер тюбюнде байлыкъланы хайырланыргъа эркинлик берген лицензияланы жарашдырыугъа эмда КъМР-ни агъач мюлкню айнытыу жаны бла къырал программасына не тюрлениуле кийирирге белгиленнгенин туура этгенди. Алагъа кёре, агъач инспекторланы санына къошуллукъду эмда республикада табийгъатны къоруулау жаны бла объектлени къурулушларын бардыргъан дирекция къураллыкъды. Дагъыда, ол айтханнга кёре, РФ-ни Къоруулау министерствосу ведомствогъа талай объект берликди.
Быйыл культура эм искусство бёлюмледе ишлеген 682 адамгъа энчи стипендияла бериллигин КъМР-ни культура министри Мухадин Кумахов билдиргенди. Ол айтханыча, 582 адамгъа ай сайын 800-шер сом тёленирикди. Энтта да 70 хунерли жаш адамгъа – 1500-шер, культураны онбеш белгили къуллукъчусуна уа – 3000-шер сом берилликди.
Ызы бла министр Мечиланы Кязим туугъанлы – 160 жыл толгъанына, Бекмурза Пачевни да 165-жыллыгъына аталгъан къууанчлы жумушланы бардырыргъа хазырланыу къалай къуралгъаныны юсюнден билдиргенди. Зумакъулланы Танзиляны бла Зубер Тхагазитовну 85- жыллыкъларын кенг белгилеу жаны бла къурау комитет боллугъун да айтханды.
Жыйылыуда дагъыда Правительствону бла Туризм жаны бла федерал агентствону арасында Къабарты-Малкъарда «Зарагиж» туркластерни къурау жаны бла келишимни, регионну бойсунууунда болгъан автомобиль жолланы тизмесин тийишдириуню, физкультура эмда спорт бла байламлы къырал программада тюрлениулени, социал жаны бла ишлеген коммерциялы болмагъан организациялагъа субсидияла бериуню юслеринден да сёлешиннгенди. Жыл санлары пенсиягъа жууукълаша келген гражданлагъа къошакъ билим бериу къалай къураллыгъыны эмда анга ненча сом къоратыллыгъыны юсюнден да къысха айтылгъанды.
