Лэжьыгъэ IуэхукIэ Къэбрдей-Балъкъэрым къэ­кIуащ Урысей Федерацэм Кавказ Ищхъэрэм и IуэхухэмкIэ и министр Чеботарев Сергей. КъБР-м и ­Iэтащхьэ КIуэкIуэ Юрий щIыгъуу абы къилъэтыхьащ республикэм и щIыналъэм щыщу псы­дзэм зэран нэхъыбэ къыщихьа щIыпIэхэр.

КъызэрымыкIуэ щы­тыкIэм и хабзэр щагъэува щIыпIэм щыIэ щытыкIэм нэгъэсауэ щыгъуазэ защIа икIи зэхэкъутэныгъэ псори зрагъэлъэгъуа нэужь ­абыхэм ирагъэкIуэкIащ КъБР-м и Правительствэм, Iуэхум егъэщIылIа министерствэхэмрэ ведомствэ­хэмрэ я унафэщIхэр зыхэта зэIущIэ.

Чеботарев С. В. къыхигъэщхьэхукIащ Къэбэрдей-­Балъкъэрым и къэрал влас­тым и органхэм къапэщыта Iуэху мытыншхэр дэгъэкIыным къаруушхуэ зэрырахьэлIам и фIыщIэкIэ щытыкIэр зэман кIэщIым къриубыдэу зэтеувэжу зэ­рыхуежьар. «Дэ псори иджыпсту дрикIуащ Iуа­щхьэмахуэ курортым ухуэ­зышэ федеральнэ гъуэгум. Курортым икъукIэ турист куэд щыIэщ икIи ­абыхэм шынагъуэншэу за­гъэ­псэху. КIуэкIуэ Юрий зи пашэ штабым хузэфIэкIащ къызэрымыкIуэ щытыкIэм и зэраныгъэхэр игъэмэ­щIэн. Иджыпсту дэ ди къалэнщ районым и псэукIэр нэгъэсауэ зэтедгъэувэжыну. МахуитI япэкIэ УФ-м и Президентым и полномочнэ лIыкIуэу Кавказ Ищхъэрэ федеральнэ округым щыIэ Матовников ­Сергей тщIыгъуу дытепсэ­лъыхьауэ щытащ псыр къызэриуам къыдэкIуа ­гугъуехьхэм. Лэжьыгъэхэр зэрекIуэкIым иджыпсту езыр и щхьэкIэ кIэлъоплъ УФ-м и Правительствэм и УнафэщIым и къуэдзэ ­Мутко Виталий. Гузэвэ­гъуэм къихьа зэхэкъутэныгъэхэр нэгъэсауэ дгъэзэ­кIуэжын, апхуэдэ дяпэкIэ къэдгъэмыгъэхъун папщIэ дэ адэкIэ инфраструктурэр дгъэбыдэну, псы Iуфэхэр зыхуей хуэдгъэзэну къытпэщытщ. Ап­хуэдэ Iуэхухэм лъэныкъуэ псори къэлъы­тауэ бгъэ­дыхьэпхъэщ», - жиIащ министрым.

КIуэкIуэ Юрий зэрыжи­IамкIэ, дунейм и щытыкIэнур къэплъытэмэ, адэкIи гугъуехьхэр щыIэнкIэ хъунущ. Псори зэтезыкъутэ псыдзэхэр гъэ къэс къох. Дуней псом зэхъуэкIыныгъэшхуэхэр зэрыщыIэр къэ­плъытэмэ, адэкIэ ды­зыхуэкIуэнкIэ хъунухэр тэмэму къэлъытапхъэщ икIи абыхэм япкъ иткIэ цIыхухэр гузэвэгъуэ хэмыгъэхуэным пыщIа Iуэхухэм нэхъ куууэ егупсысын ­хуейщ. Iуащхьэмахуэ рай­оным къыдэкIуэу, псыр ящIэуэнкIэ хъунущ Аруан, Дзэлыкъуэ, Шэрэдж, Шэ­джэм, Прохладнэ, Май, Тэрч районхэм ящыщ жылагъуэхэм.

ЗэIущIэр зыщыхэплъа Iуэхухэм ятеухуауэ къэпсэ­лъащ КъБР-м и Правительствэм и УнафэщIым и къуэдзэ - КъБР-м инфраструктурэмрэ бжыгъэхэр зи лъабжьэ зыужьыныгъэмкIэ и министр Бэлэтокъуэ В. Хь., Iуащхьэмахуэ муниципальнэ районым и Iэтащхьэ Залиханов Къ. Хь.-У., УФ-м и МЧС-м и Уп­равленэ нэхъыщхьэу ­КъБР-м щыIэм и унафэщI Надежин М. В., Къурш геофизикэ институтым и уна­фэщI Беккиев М. Ю., Гидрометеорологиемрэ ды­къэ­­зыу­хъуреихь дунейм и щы­ты­кIэм кIэлъы­плъы­ным­кIэ Къэбэрдей-Балъкъэр центрым и унафэщI Богаченкэ Е. М., «Кавказ» гъуэгур зехьэнымкIэ управ­ленэ» федеральнэ къэрал IуэхущIапIэм и унафэщIым и къуэдзэ Гулаков В. В., «Межрегионгаз Газпром Налшык» жэуап зэхэгъэ­щхьэхукIа зыхь зэгухьэныгъэм и генеральнэ директор Цыплухин А. Г., «Кавказ Ищхъэрэм и МРСК» зэгухьэныгъэм и къудамэм - «Къэббалъкъэнерго» зэгухьэныгъэм и унафэщIым и къалэнхэр зыгъэзащIэ, инженер нэхъыщхьэ Егъэн А. А., «Рос­телеком» акционер зэгу­хьэныгъэ зэIухам и «Ипщэ» Къэбэрдей-Балъкъэр къудамэм и уна­фэщIым и ­къуэдзэ Ма­цIыхъу Ф. В. сымэ.

Шэджагъуэ нэужьым УФ-м Кавказ Ищхъэрэм и IуэхухэмкIэ и министрымрэ КъБР-м и Iэтащхьэмрэ къызэхакIухьащ социальнэ IуэхущIапIэ зыбжанэ, абыхэм «ДыгъафIэ къалэ» сабий творчествэмкIэ академие» щIэныгъэ гуэдзэн щрагъэгъуэт IуэхущIапIэ инри яхэту.