Мэрем кIуам КIуэкIуэ К. В. Правительствэм и Унэм щригъэкIуэкIащ Къэбэрдей-Балъкъэр Республикэм КъызэрымыкIуэ щытыкIэхэр къэмыгъэхъунымрэ абыхэм я лъэужьхэр гъэзэкIуэжынымкIэ и комиссэм и зэIущIэ. Абы хэтащ КъБР-м къегъэщIылIа федеральнэ инспектор Ткачёв А. Е.
Урысейм и МЧС-м и Управленэ нэхъыщхьэу КъБР-м щыIэм, Iуэхур зэгъэщIылIа министерствэхэмрэ ведомствэхэмрэ я унафэщIхэм, муниципальнэ щIыналъэ щхьэхуэхэм я Iэтащхьэхэм къапсэлъахэм едэIуа нэужь, КIуэкIуэ Казбек къигъэлъэгъуащ Iуэху гузэвэгъуэхэр къэмыхъун папщIэ япэ зигъэщауэ зыхуэфащэ лэжьыгъэхэр зэрегъэкIуэкIыпхъэр. Гулъытэ хэха зыхуэщIын хуейхэм ящыщу абы къыхигъэщхьэхукIащ гъатхэ псы къиугъуэм зыхуэгъэхьэзырыныр.
ЗэIущIэм къызэрыщагъэлъэгъуамкIэ, 2019 гъэм гъатхэ псы къиугъуэм зыхуэгъэхьэзырыным, гидротехникэ ухуэныгъэхэр зыхуей хуэгъэзэным сом мелуан 75-м щIигъу хухахащ. МЧС-м и щIыналъэ IуэхущIапIэм къызэрилъытэмкIэ, муниципальнэ щIыналъэ зыбжанэм хиубыдэ жылагъуэу псыр зыщIэуэнкIэ хъунухэр 63-рэ мэхъу. Абы къыхэкIыу иджыпсту егугъуу псы Iуфэхэр ягъэбыдэ, псы лъэгухэр ягъэкъабзэ, псыдзэ къызэхынкIэ хъуну щыгухэмрэ джабэхэмрэ я щытыкIэм кIэлъоплъ, лъэмыж лъабжьэхэр къагъэкъабзэ, къызэрымыкIуэ щытыкIэхэмкIэ щIыналъэ IуэхущIапIэхэм я техникэмрэ адрей Iэмэпсымэхэмрэ лэжьы-гъэм зэрыхуэхьэзырыр щIапщытыкI.
Иджыблагъэ республикэм и район щхьэхуэхэр къыщызэхикIухьым КIуэкIуэ К. В. Урожайнэ къуажэм, Александровскэ, Котляревскэ станицэхэм щыпсэухэм къыжраIащ Тэрч, Шэрэдж псыхэм я Iуфэхэм я щытыкIэм зэрытегузэвыхьыр. Апхуэдэ зэкIэлъымыкIуагъэхэр Шэджэм псыкъелъэхэм я Iэшэлъашэхэми щыболъагъу, Налшык псым и Iуфэхэр зэрагъэбыдауэ щыта ухуэныгъэхэми хэкъутыкIауэ щIыпIэ куэд яIэщ.
КIуэкIуэ К. В. зэIущIэм хэтахэм гу лъаригъэтащ псыхэм я щытыкIэм зэпымыууэ кIэлъыплъын, мы Iуэхум полицэм и органхэр, адрей хабзэхъумэ IэнатIэхэр, волонтёрхэм я зэгухьэныгъэхэр къыхэшэн зэрыхуейм. КъызэралъытамкIэ, дэнэ щIыпIи щыгъэувын хуейщ шынагъуэ къыщыхъуам деж хъыбар зэгъэщIапхъэхэм я телефонхэр зытет хъыбарегъащIэ пхъэбгъухэр икIи абы и лъэныкъуэкIэ цIыхубэ хъыбарегъащIэ IуэхущIапIэхэм я зэфIэкIри гулъытэншэу къэгъэнэн хуейкъым.
«Iуэху гузэвэгъуэхэм и зэманым япэщIэувэнымкIэ, ди цIыхухэм я гъащIэмрэ узыншагъэр хъумэнымкIэ дэ тщыщ дэтхэнэ зыми жэуап хэха къыбгъэдохуэ. Ар дэ зыщыдгъэгъупщэ хъунукъым. Дунейм и щытыкIэм псынщIэу зэрызихъуэжым къыхэкIыу псэуныгъэм пыщIа IуэхущIапIэхэм, экономикэмрэ социальнэ IэнатIэмрэ хэщIыныгъэхэр ягъуэтынымкIэ шынагъуэ къатохьэ. Ди жагъуэ зэрыхъущи, иужьрей илъэсхэм республикэм апхуэдэ шынагъуэу куэд къызэринэкIащ - щIыпIэ щхьэхуэхэм ятIэпсхэр, уэсукхъуэхэр къыщехащ, борэнышхуэхэр щыIащ, цIыху куэд щызэблэкI щIыпIэхэм мафIэсхэр къыщыхъуащ», - къигъэлъэгъуащ щIыналъэм и УнафэщIым.
Комиссэм и зэIущIэм зэрыщыжаIамкIэ, шынагъуэ нэхъыщхьэхэм ящыщщ мэкъумэш щIапIэхэм удз ежьужьхэр зэрыщагъэлыр, мэз лъапэхэм мафIэхэр зэрыщащIым къыхэкIыу губгъуэхэмрэ мэзхэмрэ мафIэс инхэр къыщыхъункIэ зэрыхъунур. 2019 гъэм гъатхэпэм и 11-м ирихьэлIэу удзым, куэншыб идзыпIэхэм къыщылыда мафIэу 213-рэ ягъэункIыфIащ. Апхуэдэ Iуэхухэр нэхъыбэу къыщыхъуащ Налшык, Прохладнэ къалэхэм, Аруан, Май районхэм.
КъБР-м и Iэтащхьэм и къалэнхэр пIалъэкIэ зыгъэзащIэм къигъэуващ къызэрымыкIуэ щытыкIэхэмкIэ комиссэхэм я зэIущIэхэр дызэрыт мазэм къриубыдэу республикэм и муниципальнэ щIыналъэ псоми щрагъэкIуэкIыну.
ЗэIущIэм и кIэухым къащтащ шынагъуэ нэхъ къыщыхъункIэ хъуну щIыпIэу, IуэхущIапIэу щыIэхэм я спискэр.