Мусуков Алий абы теухуауэ иригъэкIуэкIа зэIущIэм къыщыпсалъэм Iуащхьэмауэ районым и Iэтащхьэ Залиханов Къанщобий зэпкърихащ лэжьыгъэхэр зэре­кIуэкIыр. Абы къигъэлъэгъуащ адэкIи гузэвэгъуэхэр къэмыхъун папщIэ дунейм и щытыкIэм жэщми махуэми зэрыкIэлъыплъыр. Тырныауз къалэм деж Бахъсэн псыр сантиметр 40-кIэ щетIысэхыжащ.

Къуажэ къэс электрокъарур иджыпсту тэмэму яIэрохьэ. ЭлектрокIапсэхэр зрикIуэ пкъохэм ящыщу 6-р щIилъэсыкIати, ахэр щIэуэ хатIэж. Газ бжьамийхэри зэтрагъэувэжащ. Апхуэдэу псыкIэ жылагъуэхэр къызэрагъэпэщыжащ.

«Гъуэгу лэжьыгъэхэр жэщми махуэм йокIуэкI, абы папщIэ къагъэсэбэпу щыта техникэ Iэмэпсымэ 17-р 30-м нагъэсащ, цIыху 25-м я пIэкIэ иджы цIыху 45-рэ мэлажьэ», - къигъэлъэгъуащ «Кавказ» гъуэгур зезыхьэ управленэ» федеральнэ къэрал IуэхущIапIэм и унафэщIым и къуэдзэ Гулаков Виталий.

«Прохладнэ - Бахъсэн - Азау» федеральнэ автомобиль ­гъуэгум щыщу псы къиуам гуилъэсыкIахэр зэрагъэпэ­-щыж, апхуэдэ щIыпIэхэм автомашинэхэр зы лъэныкъуэм тету щызокIуэ. Гъуэгу лэжьакIуэхэм псы Iуфэхэр Бахъсэн Ипщэ къуажэм деж щагъэбыдэ, Байдаевэ къуажэм деж псым илъэса щIыпIэр тракIутэж.

УФ-м и МЧС-м и Управленэ нэхъыщхьэу КъБР-м щыIэм и унафэщI Надежин Михаил и псалъэм къыхигъэщащ мы щIыпIэм техникэ зэмылIэужьыгъуэу 46-рэ къызэрыщагъэсэбэпыр цIыху 300-м щIигъу зэрыщылажьэр.

- Республикэм псыхэр къиунымкIэ шынагъуэр иджыри щхьэщыкIакъым, жиIащ Мусуков Алий. - АдэкIи уэшхышхуэ къешхынкIи хъунущ. Абы къыхэкIыу сыт хуэдэ гугъуехьми хуэхьэзыру дыщытын хуейщ.