Россейни Банкы финанс окъуулулукъ бла байламлы былтыр бардыргъан вебинарлагъа Къабарты-Малкъарда орта школланы бары да къатышхан эдиле. Ала бла бирге тийишли дерсле энчи орта билим берген битеу учрежденияла да бардырылгъандыла, деп билдиргендиле банкны бизни республикада бёлюмюнден.

«Проектге къатышхан школланы саны былтыр иги да кёбейгенди: буруннгу жыл бла тенглешдиргенде 30 процентни къошханды. Аны бла Къабарты-Малкъар республика быллай онлайн-дерслени бардырыу жаны бла алчы регионланы санына киргенди», - дегенди банкны бёлюмюню башчысы Балаланы Расул.

Ол айтханыча, быллай вебинарлагъа сейир уллу болгъаны баямды. Нек дегенде, финанс культура бизни жашауубузгъа терен сингнгенди, аны себепли шёндюгю адамны жашауда жетишими, къолайлыгъы да, ахчаны ол нечик жюрюте билгенине кёре болады.

Финанс окъуулулукъну юсюнден дерслени онлайн-халда Банк 2018 жылда бардырып тебирегенди. Бу проектге къыралда бар субъектле къатышадыла. Дерследе Россейни Банкыны экспертлери эмда финанс учрежденияланы келечилери школчулагъа кредитлени, вкладланы, страхованияны, инфляцияны юслеринден толу хапар айтадыла. Тынгылаучула банк карточкаланы къоркъуусузлу хайырланыргъа, энчи финанс план жарашдырыргъа, биреу хыйлачы болгъанын терк ачыкъларгъа юйренедиле.

Алайды да кезиулю сессия быйыл 22 апрельге дери барлыкъды. Дерслеге къауумлагъа жыйылып неда инсан энчи кеси къошулургъа амал барды. Проектни юсюнден толу информация https://www.dni-fg.ru/ интернет-сайтда басмаланады. Вебинарлада алгъан билимни кючлендирир хыйсап бла «Финанс окъуулулукъдан оюнла» (https://doligra.ru/) жарашдырылгъандыла.

Улбашланы Мурат