Кёп болмай «Кюн шахар» сабий чыгъармачылыкъ академияда КъМР-ни Жарыкъландырыу, илму эмда жаш тёлюню ишлери жаны бла министри Анзор Езаов бла Россейни Н.И. Пирогов атлы медицина миллет излем университетини (РНИМУ) абитуриентле бла иш бардыргъан бёлюмюню таматасы Бакеева Алла бирге ишлеуню юсюнден келишимге къол салгъандыла.
Тюбешиуде «РНИМУ: все грани высшего» проектни бардырыуну онглары да сюзюлгендиле эм аны бла билим бериу учрежденияланы таматаларын да шагъырей этгендиле.
Ол кюн химия-биология классланы бла «Антарес» араны «Химия» кёп профильли сменасыны келечилерине «Хирургия» усталыкъдан мастер-класс бардырылгъанды.
Эсге сала айтсакъ, башда сагъынылгъан проектни магъанасы - школчуланы медицина усталыкъ бла шагъырей этиудю. Алай бла ала жангы технологияла бла ишлерге юйренедиле, билимлерин эм сынамлырын да кючлерге онг табадыла.
Келишимге кёре, республиканы выпускниклерине, устазларына да курсла, программала эм башха затла да хакъсыз бардырыллыкъдыла.
Магометланы Сулейман.