Черек районну Аушигер элинде къарындашла Кубати эмда Кабард Кардановланы атын жюрютген орта школда бу кюнледе "Тенг халда сёлешиу" деген федерал проектни чеклеринде КъМР-ни финансла министри Елена Лисун бла тюбешиу къуралгъанды.
Бу проектни магъанасы – ёсюп келген тёлюге жетишимли адамланы юлгюлеринде шёндюгю Россей тенг онгланы къыралы болгъанын эмда тынгылы билим алгъан жашла бла къызла, къайсы регионда жашагъанларына, къаллай юйюрден чыкъгъанларына да къарамай, муратларына жеталлыкъларын кёргюзтюудю.
Елена Александровна тюбешиуге келгенлеге ишини эмда ол башчылыкъ этген министерство къаллай жумушла тамамлагъаныны юсюнден тынгылы хапар айтханды. Республикада бийик окъуу юйге бюджет жерлени, туризмни, устазланы иш хакъларыны, кредит ставкаланы юслеринден эм башха соруулагъа да жууапла бергенди.
Ушакъдан сора уа министр "Точка роста" арада "Промышленный дизайн", "3 Д-моделирование" жаны бла сабийлени чыгъармачылыкъларыны кёрмючюнде болгъанды. Окъуучула Елена Александровнагъа саугъагъа кеслери ишлеген шахматланы бла къыралны белгилерин бергендиле.
Районну администрациясыны башчысыны орунбасары Эфендиланы Тареза тюбешиуню хайырлыгъа санагъанды. Быллай ушакъла жаш адамлагъа кёп жангы затла билирге, усталыкъ сайларгъа да болушадыла, дегенди.
«Диалог на равных» деген проектге тийишлиликде быллай тюбешиуле районну башха эллеринде да къураллыкъдыла, деп билдиргендиле бизге Черек районну администрациясыны пресс-службасындан.
Далхатланы Марзият
хазырлагъанды.
