Кёп болмай Май районну администрациясыны башчысы Татьяна Саенко бардырып кенгеш болгъанды. Анда тамамланнган эм этилирге тийишли ишле сюзюлгендиле. Ол санда суу бла жалчытыу, элледе болумну тапландырыу, санитар мардалагъа келиширча этиу, жол мюлкню игилендириу эм башхала. Аны юсюнден бизге муниципалитетни администрациясыны пресс-службасындан билдиргендиле.
- Жети муниципалитет бла жерлерин кадастр учётха тюшюрюча техника документацияларын жарашдырыргъа келишим этилгенди. Анга кёре суу бла жалчытхан 124 объект регистрацияны ётерикдиле.
Аны бла бирге Май районну инженер сетьлери иги да тозурагъандыла, алагъа тынгылы ремонт этерге неда алышыргъа керекди,- деп билдиргенди районну администрациясыны башчысыны орунбасары Кирилл Кожухов.
Бюгюнлюкде таза суу бла жалчытырча тийишли проект жарашдырылгъанды. Аны чеклеринде Майскийде онюч километр чакълы бирде таза суу баргъан быргъыланы жангыртырыкъдыла эм скважина ишленирикди. Андан сора да, кир суу саркъгъан ызла тартыллыкъдыла.
Котляревская элде да 600 метр тенгли бирге таза суу тартыллыкъды. Александровская станицада да суу жыйылгъан жерни къурулушу башланырыкъды.
Сагъынылгъан ишле муниципалитетле миллет проектлеге бла къырал программалагъа къатышханлары ючюн бардырыладыла. Сёз ючюн, Александровская станица былтыр «Таза суу» федерал программаны эм «Жашау журт эм шахар болум» миллет проекни себеплиги бла тогъуз километрде ичер суу барырча онг къурагъанды.
Кенгешни ахырында Татьяна Саенко сагъынылгъан социал магъаналы жумушла заманында толтурулургъа кереклесин эсгертгенди. Аланы тыйгъычсыз башларча, объектлени регистрациясын да къысха заманда ётдюрюрге буюргъанды.
Магометланы Сулейман.
