Ма аллай ат бла бу кюнледе окъуу-методика пособие басмадан чыкъгъанды. Аны Искусстволаны Шимал-Кавказ къырал институтуну доцентлери Жаппуланы Лейля бла Гуртуланы Лейля жырчы къауумлагъа болушлукъгъа деп хазырлагъандыла. Бу ишлерин ала Тырныауузда Абайланы Солтан-Бекни атын жюрютген сабий искусствола школну преподаватели болуп тургъан, «Жулдузчукъла» ансамбльни къурауну башламчысы, аламат музыкант Нина Александровна Клименкогъа атагъандыла.
Репертуарны къурау жырчы къауумну бла хор коллективни башчыларыны магъаналы борчларындан бириди. Сабий хорла жаланда 20-чы ёмюрде чыгъып башланнгандыла, аны себепли алагъа деп энчи жыр жазгъан болмагъанды. Ала айнып тебирегенде уа, алагъа деп репертуарла да жарашдырылып, макъамла да къурашдырылып башланнгандыла.
Къабарты-Малкъарны композиторлары да ол ишден бир жанында къалмагъандыла. Алай республикада сабий жырчы къауумлагъа репертуар жетиширча барды деп айталлыкъ тюйюлбюз. Жаш композиторла ол кемчиликни кетериуге юлюшлерин къошарла деп ышаныулукъ барды, дегендиле пособияны авторлары.
Ала бу издание сабий музыкалы школланы хор классларына, Искусстволаны сабий школларына да жер-жерли авторланы сайларгъа болушурла деп да ышанадыла.
Жыйымдыкъгъа Къабарты-Малкъарны композиторларыны орус эмда малкъар тилледе чыгъармалары киргендиле. Аланы асламысы былтыр жыйырма беш жыл толгъан «Жулдузчукъла» сабий жырчы къауумну репертуарыны мурдорун тутадыла.
Ансамбль Тырныауузда искусстволаны Абайланы Солтан-Бекни атын жюрютген сабий школуну мурдорунда бардырады ишин. Ары жюрюгенле, хорда жырлагъанлары бла къалмай, музыкалы инструментлени согъаргъа юйренедиле, энчи литературадан, халкъ, эрттегили эмда шёндюгю макъамладан билим аладыла.
Жыйымдыкъгъа дагъыда искусстволаны сабий школуну окъутуу жаны бла бёлюмюню таматасы, халкъла аралы конкурсланы лауреаты, «Жулдузчукъну» къурагъан эмда ал кюнлеринден бери да анга башчылыкъ этип келген Жаппуланы Лейля бла интервью эм кёп суратла да киредиле.
Авторла билдиргеннге кёре, бу пособие биринчиди. Ала бу ишни андан ары бардырыргъа мурат этедиле эмда издание педагоглагъа-хормейстерлеге чыгъармачы коллективлерини репертуарларын кенгертирге болушурла деп бек ышанадыла.
Анатолий Талаев.
