2021 жыл Тырныауузну 5-чи номерли гимназиясыны орус тилден бла адабиятдан устазы Жеттеланы Лейляны эсинде къалырча болгъанды. Къырал башчыны буйругъу бла ол Россейни Президентини Сыйлы грамотасы бла саугъаланнганды. Аллай бийик даражагъа уа коронавирус ауруу кенг жайылгъан кезиуде билим бериу учреждение тыйгъычсыз ишлерин жалчытыугъа къыйын салгъаны ючюн тийишли болгъанды.
Лейля Хасановна бу окъуу юйню сынаулу устазларындан бирине саналады. Орус тилден бла адабиятдан дерсле бергенли 37 жылдан озгъанды. Кустанайда педагогика институтну бошагъандан сора тюрлю-тюрлю школлада ишлегенди, арт 12 жылны уа Тырныаууздагъы гимназияда урунады. Бу махкемени оноучулары анга ишине чыгъармачы кёзден къарагъан, уллу жууаплылыгъы да болгъан, терен билимли устазгъача уллу сый бередиле.
Аны дерслери айырмалыдыла: ол хар окъуучугъа энчи эс бурады, ангылатыуну амалларын, формаларын, пособияларын да бирге уста келишдиреди. Аны хайыры уллу болгъанына уа окъуучуларыны жетишимлери шагъатлыкъ этедиле. Ала бир къырал экзаменде хар заманда айырмалы болуучудула, орта эсеп бла алгъанда, орус тилден 79, адабиятдан – 96 балл алыучудула. Арт жыллада уа Бапыналаны Мариям, Борчаланы Гюлсюн, Тёппеланы Алсу, Анна Курбанова, Маргарита Молодцова балларын жюз процентге окъуна жууукълашдыргъандыла.
Коронавирус кенг жайылып, узакъдан окъутургъа тюшгенде да, Лейля Хасановна кесини борчун бет жарыкълы толтургъанды. «Ол манга жангы сынау болгъанды – башха тюрлю болумда ишлеу энчи амалны излегенди. Техника жаны бла да чырмаула чыкъгъандыла. Окъуучула бла кюн сайын байламлыкъ къураргъа керек эди.
Халатланы тюзетиу бла ишлеу, керекли материалланы жыйышдырыу кёп заманны алгъанды. Адабиятдан заданияланы болжалдан алгъа берирге тюшгенди. Мен окъуучуларым кеслери сагъыш этерча, оюмларча соруула жарашдырыргъа кюрешгенме. Кейсле, сахна оюнла, практика кезиуле ишимде баш жерни алгъандыла. Алай бла, аз-аздан сынау жыйышдыргъанбыз, ол бизге мындан ары да болушур деп умут этебиз»,- дегенди устаз.
Аны окъуучулары устазларыны башчылыгъында тюрлю-тюрлю конкурслагъа, олимпиадалагъа къатышадыла эмда хорламла да болдурадыла. Сёз ючюн, Маргарита Молодцова сочиненияланы битеуроссей конкурсунда, Мария Молотай а «Живое слово» деген республикалы эришиуледе биринчи жерлеге чыкъгъандыла.
Жеттеланы Лейля кеси да къатышады аллай ишлеге. «Жылны устазы -2017» битеуроссей конкурсну муниципал кесегинде «Мастер-класс» номинацияда хорлагъанды. Аны бла да къалмай, усталыгъын дайым ёсдюреди, педагогланы жыйылыуларына къатышады, энчи курслагъа жюрюйдю, орус тилден бла адабиятдан окъутууну амалларын жарашдырады эм басмалайды.
Устазны коллегалары ол ачыкъ жюрекли, кимге да болушургъа хазыр болгъан, игиликле тежеген адам болгъанын чертип айтадыла. Кёп жылланы ичинде бет жарыкълы уруннганы, окъутуу ишни иги къурагъаны, окъуучуланы ахыр экзаменлеге тынгылы хазырлагъаны ючюн Жеттеланы Лейля «Россей Федерацияны битеулю билим бериуюню сыйлы ишчиси» деген белги, Къабарты-Малкъар Республиканы Билим бериу, илму эмда жаш тёлюню ишлери жаны бла министерствосуну Сыйлы грамотасы, Элбрус районну администрациясыны грамотасы бла да саугъаланнганды.
Анатолий ТЕМИРОВ.
Суратда: Жеттеланы Лейля дерс бере тургъан кезиуде.
