Тюнене Пекинде XXIV Къыш Олимпиада оюнла
башланнгандыла. Алай бла 17 кюнню ичинде битеу дунияны белгили спортчулары кючлерин сынарыкъдыла.
Къыш Олимпиаданы, жай Оюнланыча, арт кезиуге кёчюре турмагъандыла. Болсада стартла ковид бла байламлы жорукълагъа тийишлиликде ётерикдиле. 2008 жылдача, бу Оюнланы да къууанчлы ачылыулары «Чыпчыкъ уя» деген миллет стадионда бардырылгъанды. Аны постановкасын, 14 жыл мындан алгъача, белгили режиссёр Чжан Имоугъа ышаннгандыла.
Быйылгъы эришиулеге 95 къыралдан 4 мингден аслам спортчу къатышырыкъдыла. Россейли спортчуланы саны 212 болады. Ала спортну 15 тюрлюсюнде 109 комплект майдал ючюн эриширикдиле. Къыш Оюнланы юслеринден айтханда, алагъа бу жолгъа дери болмагъан, 7 жангы тюрлюсю къошулгъанды:
Бизникилени юслеринден айтханда, хоккейден жыйымдыкъ командабызда къоранчла болгъандыла. Ковид бла байламлы болумну эсге ала, спортчуларыбызны энчи самолёт бла окъуна элтген эселе да, Къытайда этилген тест келгенлени араларында да ауругъанла болгъанларын кёргюзтгенди. Алай хоккейден эришиуле энтта да бир ыйыкъдан башланырыкъларын эсге ала, спортчула Оюнлагъа къатышырча болурла деп ышанабыз.
Олимпиаданы къууанчлы ачылыуунда Россейни командасыны аллында байракъланы белгили спортчула Ольга Фаткулина бла Вадим Шипачёв элтгендиле. Бу сыйлы жумушну алагъа ышаннганлары жаланда бир кюн алгъа белгили болгъан эди.
Бу Олимпиада оюнлагъа дипломатиялы къаршчылыкъ этген 6 къырал бардыла. Спортчуларына эришиулеге къатышыргъа ала чырмау салмагъанлыкъгъа, Къытайдан келген чакъырыу къагъытлагъа уа Американы, Великобританияны, Канаданы, Австралияны, Литваны, Косовону, Японияны эм Германияны къырал къуллукъчулары эс бурмай къойгъандыла.
Дагъыда Шимал Кореяны командасы да къатышмайды. Ол а Халкъла аралы Олимпиада Комитетни оноуу бла байламлыды. Эсигизге салайыкъ, ала былтыр Токиода озгъан жай Олимпиада оюнлагъа къатышыргъа унамай къойгъан эдиле.
Пекиннге келген къонакъланы араларында РФ-ни Президенти Владимир Путин да барды. Ол Оюнланы къууанчлы ачылыуларына къатышырдан алгъа Къытайны таматасы Си Цзиньпин бла къыралла аралы байламлыкъланы кючлеу жаны бла тюбешиу ётдюргенди.
Россейли спортчула бу жол да эришиулеге Олимпиада комитетни байрагъы бла къатышадыла.
Майдалла бла байламлы умутланы юсюнден айтхан бюгюнлюкде къыйыныракъды. Нек дегенде вирус бла байламлы болум кюн сайын кесини тюрлениулерин кийире барады. Болсада майдалла саны бла биринчи жерде экспертле Норвегияны командасын кёредиле. Россейни жыйымдыкъ командасын а ючюнчю тизмеде орнатадыла. Кёрейик.
Эришиуле уа, Оюнланы ачылыуларын да сакъламай, башланнгандыла.
Таппасханланы
Аминат.