Кёп болмай Нальчикде Республикалы сабий клиника больницагъа тынгылы ремонт этип башлагъандыла. Аны жангыртыргъа эм керек оборудование бла жалчытыргъа къыралны Правительствосуну резерв фондундан 120 миллиондан аслам сом бёлюннгенди.

Медицина учрежденияны баш врачыны къуллугъун толтургъан Мадина Кашежева билдиргеннге кёре, стационарны корпусларында ремонт баргъанлыкъгъа, аны ишине чырмау салмайды.  Жаланда план бла жатхан саусузланы жерлерини бир кесегин азайтыргъа тюшгенди. Алай керек болса, аланы санына кереклиси тенгли бир къошар амал барды.

Корпусланы алтысында да юй башларыны къанжалларын, терезелерин, эшиклерин, коммуникацияларын, хауа жюрюген системаларын эм от тюшгенни билдирген сигнализацияларын да жангыртырыкъдыла. Ол санда бийик технологиялы операцияла этерге жарагъан жангы хирургия корпус эм жангы приём бардыргъан бёлюм да ачыллыкъды.

Объект саулай быйылны ахырына битерге керекди.

Магометланы Сулейман.