Бу кюнледе Къабарты-Малкъар республикада квадроцикллада экспедиция бардырылады. Быйыл ол ахыр экспедицияды, кеси да «Наследие России» деген проектни чегинде ётеди.
Экспедицияны Москва шахардан «Квадроостров» клубу, Орус география биригиуню «Альтаир» жаш клубу, КъМР-ни Курортла эм туризм министерствосуну болушлугъу бла къурагъандыла. Ары Москвадан эм Москва областьдан къыйын жоллада  жюрюрге сюйгенле къатышхандыла. Аланы бир къаууму уа юйюрлери бла келгендиле.
Экспедицияны ызы алты ауушдан эм жети ёзенден ётгенди. Биринчи кюн къауум Элбрусда орналгъан Россейни МЧС-ни   бийик  тау излеу-къутхарыу отрядында эсепге тюшгенди, андан сора агъач бла барып Нальчик сууну ёрге жагъасын, Сукансуу ёзенни, Метеген ауушну, Чайнашкы ёзенни эм Чегет-Жара ауушну ётюп Бызынгы альплагерьге кётюрюлгендиле. Кюнню халы ариу тюйюл эди. Къар боран кётюрюлюп, барыргъа бек къыйын эди. Алай жыйылгъанла, неге да чыдап, бир бирге болушуп чырмауланы хорлап, барыр жерлерине жетгендиле. 
Экспедициягъа къатышханла миллетибизни тарыхы бла байламлы кёп сейирлик жерлени кёрлюкдюле, дагъыда бизни республикабызны жашауу бла шагъырейленирикдиле. Ортадагъы лагерьле Чегем эм Малка  череклени башларында боллукъдула. Ахыр кюнледе ала Минги тауну къыбыла жанындан шимал жанына келип, Эммануэль таланы кёрюп, эм Къан жол сыртдан  ётерикдиле. Экспедицияны краевед, Орус география биригиуню келечиси Мокъаланы Тенгиз къурагъанды. 
«Квадроостров» клубну таматасы Александр Зиминни айтханына кёре, «Наследие России» проектни баш магъанасы квадроцикллада эм внедорожникледе жюрюрге сюйгенлеге жолоучулукъ халда Россейни табийгъатыны эмда тарых-маданият хазнасыны юсюнден билдириудю. 

Басмагъа Додуланы Мадина хазырлагъанды.