25 сентября, 2021 - 06:30
Кёп болмай транспорт инфраструктура реформагъа кёре, билетлени бирикдирирча Москва бла Нальчик «Тройка» транспорт картаны ишлетирге келишгендиле, деп билдириледи Нальчик шахар округну пресс-службасындан.
Сагъынылгъан билет система жамауат транспортда жюрюгенлени онгларын игилендириуге ахшы себеплик этерикди. Картаны тутханла тарифлени сайларгъа, электрон халда тёлерге да боллукъдула. Аны бла бирге быллай амал пассажирлени санын тюз тергерге эм шахарда маршрут ызны да игилендирирге болушурукъду. Улоуланы ишине чырмау салмазча, жангы тёлеу халгъа акъырын кёчерге мурат этиледи.
Россейни регионларында билет системаны бирикдириу бла байламлы «Тройка» проект «Transport Ticketing Awards 2021» деген халкъла аралы премияда «Акъыллы билет системаладан эм иги программа» категорияда хорлагъанды.
КУРДАНЛАНЫ
Сулейман.