Бу кюнледе Сочиде Россейни асламлы информация органларыны «Вся Россия – 2021» деген аты бла жыйырма бешинчи форуму-фестивалы барады. Анга Къабарты-Малкъарны журналистлерини къаууму къатышады. Ол делегациягъа башчылыгъ а республиканы Журналистлерини союзуну председатели Шауаланы Разият этеди. Биз анга, телефон бла сёлешип, бир къауум соруу бергенбиз.
– Разият, къыралда, дунияда да къыйын заманнга къарамай, жыйылгъансыз. Ким къурагъанды фестивальны?
– Тёреде болуучусуча, бу ишде башламчылыкъ Россейни Журналист союзундады. Бу жыйылыу юбилейли болгъаны бла байламлы келген да кёп этгендиле – мингден аслам журналист Россей регионладан, тыш къыралладан да бардыла. Хау, къоркъуулу заманды. Краснодар крайны губернаторуну бегимине кёре, хар бир бери келгенни вакцинация этилген къагъыты, ауругъан адам бар эсе уа, ол ауругъанлы алты айдан кёп ётмегенине да шагъатлыкъ къагъытла суралгъандыла.
– Къалай тюбедиле келгенлеге?
– Аламат. Мен хар заманда сейир этеме союзну таматаларыны, бютюнда аны председатели Владимир Геннадьевич Соловьевну, къураучу хунерлерине. Тюз биз да Адлерге келип тюшгенибизлей, ала къурагъан трансфер автобус келгенлени Адлерни аэропортундан Сочиде «Жемчужина» гостиницагъа келтиргенди. Аллай къонакъбайлыкъ хар делегациягъа да этилгенди. Андан арысында да аланы билекликлерин кёрюп турабыз хар неде да. Жыйылыуну Краснодар крайны губернатору Вениамин Иванович Кондратьев ачханды.
– Фестивальны программасы къалайды?
– Бек магъаналы – кёрмючле, презентацияла, кенгешле, мастер-классла, ол-бу проблемагъа аталгъан конференцияла, журналистикада белгили профессионалла бла тюбешиуле, «тёгерек столла», «Телевизионная гостиная», дискуссия клубла…Бирин айтып, бирин къоярча тюйюлдю. Быйыл биринчи кере бу даражалы фестивальгъа, алда сагъыннганымча, тыш къыраллы журналистле, Россей телевиденияны академиясыны членлери да къатышадыла.
– Быллай жыйылыула неге юйретедиле журналистни, сени оюмунга кёре?
– Бек аллындан, бюгюннгю кюнню излемлерине тийишли ишлерге. Уллу сынаулары болгъан адамла бла олтуруп, алагъа тынгыласанг, сюйсенг-сюймесенг да, аладан кёп зат аласа. Хар замандача, жыйылыуда шёндюгю журналистикада болумну, аны жарсыуларыны юсюнден да айтылады.
– Сиз а ары не алып баргъансыз? Не бла махтаналлыкъды бизни республика журналистикада?
– Биз да, башхалача, газетлерибизни, журналларыбызны келтирип, кёрмюч къурагъанбыз. Телевидение бериуле да алгъанбыз биргебизге, мында кёргюзтюрча. Кёпле келип, къарап, бизни басма органларыбызгъа сейирлерин кёргюзтгендиле, тилеп алгъанла да болгъандыла аладан.
– Тенглешдиргенде, бизни басма продукциябыз башхаланы жанларында къалай кёрюнеди?
– Хар регионну кесини энчи жетишими барды быллай ишледе. Юйренирге да болады, юйретирге да онг чыгъады.
– «Телевизионная гостиная» деп да барды программабызда дейсе. Ол а неди?
– Анда уа биз жашагъан, ишлеген жерибизден келтирген, быллай жерге тийишли кёрген телевидение кинолагъа, бериулеге къарайбыз. Ол жаны бла ишлеген журналистлеге бу уллу дерсди.
– Мастер классланы, семинарланы бардыргъанланы юслеринден да айтсанг эди.
– Ала халкъ таныгъан адамладыла. Сёз ючюн: тележурналист, телеведущий, журналистиканы институтда устаз, «Артмедиаобразование» биригиуню президенти Арина Шарапова, «Аргументы и факты» газетни таматасы Руслан Новиков, «Перспектива» журналны баш редактору Евгения Михайлова, ОТР-ни генеральный директоруну орунбасары Александр Пономарев, «Московский комсомолец» газетни баш редактору Павел Гусев эм башхала. Аланы къайсысыны да сынамлары уллуду.
– Быллай форумлада жетишимли журналистлени эришиулери да болады, алагъа саугъа да бередиле. Ол иш а къалай къуралады?
– Фестивальны чеклеринде баргъан конкурслада, аланы уа Россейни Журналистле союзу бла Россей телевиденияны академиясы бирге къурайдыла, хорлагъанланы жыйылыуну ахырында белгилейдиле. Быйыл битеу да журналист ишле Сочи курортха жораланнгандыла. Лауреатланы саугъалау шахарны Зимний театрында барлыкъды. Быйылны бир энчилиги – «ТЭФИ-Мультимедиа» журналистикада бийик жетишимле этгенлеге Биринчи миллет премия берилликди.
Ушакъны Кертиланы
Сакинат бардыргъанды.
