13 сентября, 2021 - 06:52
Сабийлени окъуу жыллары башланнганлы кёп болмайды. Нальчикни 14-чю номерли гимназиясыны директору Римма Жамборова газетни корреспондентине билдиргенине кёре, анда быйыл 1920 жаш бла къыз билим аллыкъдыла.
Республиканы бирси школларындача, мында окъутуу шёндю санитар-эпидемиология болумлагъа кёре къуралады. Биринчи къонгуроу бу жол жаланда 1-чи классда окъурукъ жашчыкълагъа бла къызчыкълагъа эшитдирилген эди. Ала уа быйыл алты класс боладыла.
Биринчи сентябрьде линейкада, тёреде болуучусуча, Россей Федерацияны эмда Къабарты-Малкъарны къырал гимнлери согъулгъанды. Аллай эм анга кёре башха юлгюле ёсе келген тёлюню Ата журтларына, республикабызгъа сюймекликлерин, патриот сезимлерин айнытыргъа, кючлерге бютюн алландырадыла.
Къызчыкъла бла жашчыкъла школгъа келген кюнлеринде окъуна назмуланы шатык айтханлары эм «Буратино» жомакъдан къысха оюн кёргюзтгенлери уа ол унутулмазлыкъ кезиуню бютюн хычыуун такъыйкъасы болгъанды.
Римма Жамборованы белгилегенине кёре, мектепде окъуучулагъа тийишли билим алыргъа битеу онгла къуралгъандыла, сынамлы устаз къауум да ол жаны бла уллу иш бардырады.
Бизни корр.