Биринчи сентябрьде Къабарты-Малкъар Къыраллыгъыны кюню бла бирге 
Билимни кюнюн да белгилегенди

Сентябрьни биринчи кюнюнде школлада парталаны артларына  биринчи классха баргъан 12 500 сабий олтургъанды. Билим берген окъуу юйле ишлерин тёрели халда башлагъандыла.
КъМР-ни Башчысы жангы окъуу жылны Черек районну Огъары Жемталада Чубакъланы Алийни атын жюрютген орта школну биринчи классха баргъан сабийлери эм устазлары бла тюбегенди. Казбек Коков къууанчлы линейкада сюелгенлени Билимни  эм Къабарты-Малкъар Республиканы Къыраллыгъыны кюнлери бла алгъышлагъанды, окъууларында жетишимли болурларын тежегенди. Къууанчлы жыйылыугъа Черек муниципал районну администрациясыны башчысы Муртазланы Борис да къатышханды.
Къабарты-Малкъарны Башчысы башда сагъынылгъан кезиуле бла Инстаграмны кесини энчи бетинде алгъышлау сёзюн басмалагъанды:
«Къабарты-Малкъарны хурметли инсанлары! Багъалы школчула, студентле, устазла эм ата анала!  
Жюрегими ичинден сизни барыгъызны да Билимни кюню бла эм жангы окъуу жыл башланнганы бла алгъышлайма.
Биринчи сентябрьде устазланы ишлеринде жангы кезиу башланады, ала окъуучула бла тюбешгенлерине къууанадыла. Студентлеге бла окъуучулагъа уа-къууанчлы жашау  эм сейир шартладан толу кезиу башланады, ол заманлада шуёхлукъ кючленеди, билим алыргъа итиниулюк тууады, жангы фахмула эм онгла ачыкъланадыла.
 Быллай кюнде артыкъда бек алгъыш сёзлени сабийлени юйретиучюлеге, устазлагъа эм преподавательлеге  жоралайбыз. Аланы усталыкъларыны, ишге уллу кёллю болмагъанлыкъларыны, итиниулюклерини хайырындан келир тёлюбюзню тамблагъы кюню аланы къолларындады».  
«Устазлагъа, преподавательлеге, ата- аналагъа саулукъ эм монглукъ тежейме, школчулагъа бла студентлеге уа билимни сейир дуниясына жолоучулукъну этерге. Жангы окъуу жыл сизни барыгъызгъа да бийикликге кётюрюлюу бла байламлы болсун!» - деп жазгъанды республиканы Башчысы Инстаграмны  энчи бетинде.
КъМР-ни Башчысыны бла 
Правительствосуну пресс-службасы.