Гулъытэ «Урысей зэкъуэт» политикэ партым и «ЩIалэгъуэ гвардие» урысейпсо жылагъуэ зэгухьэныгъэм Къэбэрдей-Балъкъэрым щиIэ къудамэм хэтхэм зэIузэпэщ ящIащ Налшык къалэм дэт курыт школ № 10-м къедзылIа щIыпIэр. Ар къызэIуахащ бадзэуэгъуэм и 23-м. Физическхэ щэнхабзэмрэ спортымрэ зыщыхуагъэсэну хаха щIы Iыхьэм метр зэбгъузэнатIэу 100-м нэблагъэ къызэщIеубыдэ. НэхъапэIуэкIэ абдеж щIалэгъуалэм баскетболым и закъуэт зэрыщыджэгур. Адрей спорт лIэужьыгъуэхэм зыщыхуагъасэр школ кIуэцIырт. - Курыт еджапIэм спортым зыщыхуагъэсэ щIыпIэ зэримыIэр щызэхэтхым, «ЩIалэгъуэ гвардием» и штаб нэхъыщхьэр а Iуэхум хэдгъэгъуэзащ икIи ахъшэкIэ зыкъытщIигъакъуэри, лэжьыгъэхэр къызэдгъэпэщащ. Турникхэр я фIагъкIи тэмэму, уасэми нэхъ уезэгъыу тхуэзыщIын къыщыдгъуэтащ Ульяновск щIыналъэм. Абы и фIыгъэкIэ мы Iуэхур къызэдгъэпэщыфащ сом мин 200-м къриубыдэу, - жеIэ КъБР-м и «ЩIалэгъуэ гвардие» жылагъуэ зэгухьэныгъэм и унафэщI Абазэ Албэч. Курыт школым и унафэщI Чэрты Артур Iуэхур къызэзыгъэпэщахэм фIыщIэ яхуищIащ икIи къыхигъэщащ еджапIэм дежкIэ абы мыхьэнэшхуэ зэриIэр. - Мы зэманым щIалэгъуалэ, ныбжьыщIэ спортым зедгъэужьыным мыхьэнэшхуэ иIэщ. Ар мызэ-мытIэу къыхигъэщащ ди къэралым и Президент Путин Владимир. Абы къыхэкIыу си гугъэщ мы Iуэхур ди сабийхэм къащхьэпэну, я узыншагъэми сэбэп хуэхъуну, - жиIащ абы. Спорт утыр Iэтауэ къызэIуахащ ГТО-м къызэщIиубыдэ IыхьэхэмкIэ еджакIуэхэр зэпрагъауэу. А Iуэхум зыкърагъэхьэлIат егъэджакIуэхэмрэ «ЩIалэгъуэ гвардием» хэт спортсменхэмрэ. Ахэр зэхьэзэхуащ зэдэжэнымкIэ, нэхъ жыжьэ лъэнымкIэ, зэпекъунымрэ зыщIэIэтэнымкIэ, спорт Iэмэпсымэ дзынымкIэ, хьэлъэ къэIэтынымкIэ.