КъМР-ни Башчысы Казбек Коков Черек районда саулукъ сакълауну биринчи болушлукъ берген бёлюмюню ишин жангыртыуну регион программасы къалай толтурулгъанына къарагъанды. Аны ишчи жолоучулугъуна КъМР-ни саулукъ сакълау министри Рустам Калибатов бла Черек муниципал районну администрациясыны таматасы Муртазланы Борис къатышхандыла.
Казбек Коков бек алгъа район больницаны поликлиника бёлюмюн жокълагъанды. Анда 28 мингден аслам адам медицина болушлукъ аладыла. Мекямны 1990 жылда хайырланыргъа бергендиле, аны жери тёрт минг квадрат метрден асламды, шёндю жангыртылыргъа керекли кёп заты барды, ол санда инженер коммуникацияларын да алышындырлыкъдыла.
Тынгылы ремонтха федерал бюджетден 43,3 миллион сом бёлюннгенди. Къурулушчула мекямны башын алышындыргъандыла, шёндю ичинде болгъан отоулагъа ремонт этип башлагъандыла. Битеу ишлени 2022 жылда бошаргъа айтадыла.
Аушигерде биринчи медицина болушлукъ берген бёлюмню жангыртыу программасына кёре, бюгюнлюкде жангы амбулатория ишлене турады. Казбек Коков бла ушакъда саулукъ сакълау бёлюмде ишлегенле элге эрттеден окъуна жангы амбулатория керек болгъанын, ол жарсыуларын ала бир ненча кере айтханларын да чертгендиле. Бу объектни къурулушун жангыртыу программагъа къошаргъа онг чыкъгъанды, аны хайыры бла проблема тамамланады.
Элде беш мингнге жууукъ адам жашайды, эски мекям 1939 жылда ишленнгенди, анда саулукъ сакълауда тамамланылыргъа керекли жумушланы толусунлай тындырыргъа отоула жетишмей тургъандыла. Казбек Коков ангылатханына кёре, амбулаторияны къурулушуна федерал бюджетден 50 миллион сом чакълы бёлюннгенди, аны къурулушун 2022 жылда бошаргъа белгиленеди.
Шёндю ишлене тургъан мекям эски амбулаториядан эки кереге уллуду, кеси да 586 квадрат метрни тутады. Къурулушчула бюгюнлюкде къабыргъаланы къалап бошай турадыла, ызы бла мекямны башын жабып башларыкъдыла. КъМР-ни Башчысы амбулатория ишлене тургъан орамны да тапландырыргъа буйрукъ бергенди.
Битеу да башында сагъынылгъан программагъа кёре, РФ-ни Президенти Владимир Путинни буйругъуна тийишлиликде, Къабарты-Малкъарда 2025 жылгъа дери 13 жангы мекям ишленирикди. Нальчикде Головко атлы орамда сабий поликлиника эм Бахсан районну Дыгулыбгей элинде экинчи поликлиника бёлюм жангыртыллыкъдыла. Саулукъ сакълауну 25 объектине тынгылы ремонт этилликди.
Шёндю Нальчикде Хмельницкий атлы орамда орналгъан поликлиниканы тынгылы ремонтуну биринчи кезиую бошала турады. Жылны ахырына Атажукино элде поликлиникада эм Май районну сабий поликлиникасында жангыртыу ишле тауусуллукъдула, деп билдиргендиле КъМР-ни Башчысыны бла Правительствосуну пресс-службасындан.