Жазмасы болгъан миллет ёмюрлюкдю, деп бошдан айтыла болмаз. Биз ана тилибизде газет, журналла, китапла чыкъгъанлары бла ёхтемленебиз, къууанабыз. Ма «Заман» газет да халкъыбызны тарыхында магъаналы жер алгъанына сёз да жокъду. Ол къуралгъанлы токъсан жылдан атлагъанды. Ма андан бери тарыхыбызны, адет-тёрелерибизни, маданиятыбызны, адабиятыбызны айныу жолларыны, халкъыбызны жетишимлерини, жарсыуларыны, хунерли жаш тёлюбюзню юслеринден билдиргенлей турады.
Бусагъатда да кёрюп турабыз газетибиз кюнден-кюннге игиден-иги бола баргъанын. Ол алай болур ючюн анда ишлегенле къолларындан келгенни аямайдыла, кече-кюн демегенлей, арымай-талмай кюрешедиле. Бюгюнден тамблагъа газетни чыгъарыр ючюн къаллай бир кюч салыргъа керекди! Аны кёпле ангыламайдыла, жарсыугъа.
Да хау, хар адам да бирча тюйюлдю, оюмла да башха-башхаладыла. Бирле газетибизде политика асыры кёпдю, къуруда къырал органланы юсюнден жазып нек турасыз, дейдиле. Алай учредительлери Парламент бла Правительство болсала, аланы ишлерини юсюнден къалай жазарыкъ тюйюлсе? Ала этген ахшы ишлени да халкъ билирге керекди. Жангы бегимле, тюрлениуле - барысы да керекли затладыла.
Басмада ишлеген, башында сагъыннганымча, къыйынды. Кёп къужур затла да эшитирге тюше болур. Алай дау, тырман этгенледен газетни аламыса деп сорсанг, бир-бирледен угъай деп эшитесе. Анга жазылмаз ючюн аллай болмачы сылтаула этерге керек тюйюлдю.
Ана тилибизде газетибиз ыйыкъгъа юч кере басма халда, беш кере да электрон халда чыгъады. Ол бизге уллу насыпды. Аны себепли анга жазылыргъа барыбыз да борчлубуз.