КъМР-ни Башчысы Казбек Коков Россей Федерацияда Регионланы айнытыу жаны бла комиссияны президиумуну вице-премьер Марат Хуснуллинни башчылыгъы бла бардырылгъан жыйылыууна къатышханды. Анда  «Жашау журтла бла шахар болум», «Къоркъуусуз эм тынгылы жолла» миллет проектле бла байламлы ишле регионлада къалай баргъанларына къаралгъанды.
Къабарты-Малкъарны юсюнден айтханда, «Жашау журтла» регион проектге кёре, быйыл жашау журтладан 513 минг квадрат метрин хайырланыргъа берирге белгиленеди. Жылны башындан бери уа 157 минг квадрат метрден аслам ишленнгенди. Ол а былтырны бу кезиуюнден эсе 7,7 процентге кёпдю.
«Жашау журтла» эмда «Регион эм жер-жерли жолла» проектлени жашауда бирге бардырыр ючюн республикалы бюджетден 50,8 миллион сом бёлюннгенди. Ол ахча Къабарты орамда инженер ызланы жангыртыугъа къоратыллыкъды. Аны уа жол-ремонт ишле башланнгынчы тындырыргъа керекди. Алай болса, жол жангыртылып бошалгъанлай, «Искож» микрорайонну суу бла чырмаусуз жалчытыргъа эмда къурулуш ишлени бардырыргъа онг чыгъарыкъды.  
«Шёндюгю шахар болумну къурау» республикалы къырал программагъа кёре уа Къабарты-Малкъарда жамауат жерледен 24 эмда арбазладан да 42-си тапландырылгъандыла. Жылны ахырына дери уа план бла 34 жамауат тийрени эмда 89 арбазны айбатландырыргъа белгиленеди.
   «Къоркъуусуз эмда тынгылы жолла» миллет проектни чеклеринде уа  116 объектден 34-сюнде белгиленнген ишле болжалдан алгъа бошалгъандыла. РФ-ни Правительствосуну резерв фондундан къошакъ халда 200 миллион сомгъа бюджетле аралы трансферт берилгенди.  Ол ахчаны орамлагъа бла жоллагъа ремонт этиуге эмда барысы да хайырланнган регион автомобиль жолланы жангыртыугъа къоратыргъа белгиленеди.
 Регион проектлеге бёлюннген ахча къалай къоратылгъанына къаралгъанда, Къабарты-Малкъар шахарда ырахат болум къурауну программасына кёре къыралны субъектлерини арасында ючюнчю жерни алады эмда жолланы къурулушлары жаны бла уа беш алчы регионну санына киргенди.
«Таза суу» проектге кёре, бюгюнлюкде 111,9 миллион сомгъа муниципал келишимле этилгендиле. Тийишли ишле бардырыладыла, ала 2021 жылда декабрьде бошаллыкъдыла.