КъМР-ни Башчысы Казбек Коков къурулуш эмда инфраструктура проектле жаны бла штабны ишчи жыйылыуун бардыргъанды. Аны ишине КъМР-ни Правительствосуну Председатели Мусукланы Алий, аны биринчи  орунбасары Муаед Кунижев, КъМР-ни къурулуш эмда ЖКХ министри Алим Бербеков, КъМР-ни транспорт эмда жол мюлк министри Аслан Дышеков да къатышхандыла.
Кенгешни кезиуюнде  федерал эмда регион программалагъа, миллет проектлеге да кирген объектлени къурулушлары къалай баргъанларына къаралгъанды. Республиканы оноучусу сабий садланы, битеулю билим берген учрежденияланы къурулушларын бардырыуну эмда жангыртыуну баш борчладан бирине санагъанды.
Билим бериуню объектлери бла байламлы халны юсюнден Алим Бербеков билдириу этгенди. Жангы Малкъарда бла Вольный Ауулда сабий садланы къурулушлары, Тёбен Черекде уа школну жангыртыу ишле къалай баргъанларыны юсюнден айтылгъанды. Казбек Коков ишлени качестволарына эмда къурулуш материалланы сайлаугъа энчи эс бурургъа чакъыргъанды, ала экология жаны бла таза, кёрюмдюлери айбат, кеслери уа  тутхучлу болургъа керекдиле, дегенди.
 Сёз жолланы бла орамланы тапландырыуну юсюнден баргъанда, КъМР-ни Башчысы орамлагъа тынгылы ремонт этилгенде, тозурагъан инфраструктураны алышындырыргъа, чыракълары бла чыпынла салынырча этерге, адамла жаяу жюрюген жерле да хар жаны бла да тынчлыкълы болурларына къайгъырыргъа кереклисин эсгертгенди.
Жыйылыуда къыралны неда муниципал заказчыны жанындан дайым да кёз-къулакъ болууну излеген къурулушланы бла ремонт баргъан жерлени юслеринден жангы шартла туура этилгендиле эмда сюзюлгендиле. Чыгъарылгъан эсеплеге кёре тийишли буйрукъла да берилгендиле.