Кюнден-кюннге коронавирус жукъгъанланы саны ёсгенлей барады. 1 июльда бир кюннге ауруу 38 инсанда ачыкъланнган эсе, тюнене, 12 июльда, аланы саны 63-ге жетгенди.
КъМР-де Коронавирусну профилактикасы эм аны жайылыууна къажау регион оператив штабдан белгили этгенлерича, пандемияны аллындан бери вирусдан 25 523 адам ауругъандыла. Тийишли багъыудан сора 24,1 мингнге жууукъ пациент сау болгъандыла (ол санда тюнене – 12).
Бюгюнлюкде медицина болушлукъ 895 адамгъа бериледи. Жарсыугъа, бу къыйын аурууну кётюралмай ёлгенлени саны ёсюп барады - 531 инсан. Ол санда тюнене вирусдан юч адам да ауушханды.
Коронавирус КъМР-де жайылып башлагъандан бери 606,4 мингден аслам тест бардырылгъанды (бир кюннге - 2091 тинтиу). Госпитальлада 509 пациентге бериледи тийишли болушлукъ, аланы арасында коронавирус ауруу жукъгъаны ачыкъланмагъанла да бардыла. Реанимация бёлюмде 65 саусуз турадыла.
Оператив штабдан белгили этгенлерича, республикада юч госпиталь ишлейди, алада 632 жер барды. Тюнене Нальчикни 2-чи номерли клиника больницасы ауруу жукъгъанланы алып башлагъанды. Анда 52 саусузгъа жерле къуралгъандыла.
Республикада коронавирусха къажау вакцинаны 51 арада салдырыргъа онг барды. Ала Нальчикде эмда битеу районлада да къуралгъандыла. Алада Спутник-V, ЭпиВакКорона эмда КовиВак дарманла хайырланыладыла. Уколну салдырыргъа «Госуслуги» порталда жазылыргъа онг барды, поликлиниканы регистратурасына сёлеширге да боллукъду.
Россейде да бир кюннге COVID-19 вирус жукъгъанланы саны 25, мингден асламды. Пандемияны аллындан бери къыралда 5,8 миллион адам ауругъандыла. Бюгюнлюкде 5,2 миллион адам сау болгъандыла – бир кюннге 16,4 минг пациент. Аурууну кётюралмай къыралда 143 минг адам ауушханды, ол санда тюнене - 710 саусуз.
Джонс Хопкинс атлы университет белгили этген тарихлеге кёре уа, битеу дунияда бу ауруу 186,8 миллион адамгъа жукъгъанды. COVID-19-дан ёлгенлени саны 4 миллионнга жетгенди.