КъБР-м и Парламентым ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и комитетым и зэIущIэм щытепсэлъыхьащ Къэбэрдей-Балъкъэр Республикэм IэщIагъэ щрагъэгъуэт курыт еджапIэхэм я лэжьыгъэр къызэрызэрагъэпэщ щIыкIэр зэрырагъэфIэкIуэнум. Абы и лъэныкъуэкIэ IэмалыфIу къагъэлъэгъуащ «Егъэджэныгъэ» лъэпкъ Iуэхум хыхьэ «IэщIагъэлI ныбжьыщIэхэр» федеральнэ проектыр.
ЗэIущIэм хэтащ КъБР-м и Парламентым и УнафэщI Егоровэ Татьянэ, абы и къуэдзэхэу Жанатаев Сэлимрэ Къардэн Муратрэ, комитетым и унафэщI Емуз Нинэ, депутатхэр, КъБР-м егъэджэныгъэмкIэ, щIэныгъэмрэ щIалэгъуалэм я IуэхухэмкIэ и министр Езауэ Анзор, республикэм и еджапIэхэм я унафэщIхэмрэ лэжьакIуэхэмрэ. Ахэр республикэм и колледж зыбжанэм (Къэбэрдей-Балъкъэр автомобиль-гъуэгу колледжым, «Строитель» еджапIэм, Къэбэрдей-Балъкъэр гуманитар-техникэ колледжым) щыIащ, еджапIэхэм щыIэ лъэщапIэхэм щрагъэкIуэкI лэжьыгъэм зыщагъэгъуэзащ.
- IэщIагъэ щрагъэгъуэт курыт еджапIэхэм иужьрей зэманым зэхъуэкIыныгъэ зыбжанэ къыщыхъуащ, я зыужьыныгъэм, псом хуэмыдэу республикэм хуримыкъу IэщIагъэлIхэр гъэхьэзырыным, сэбэп хуэхъуу. Абы и лъэныкъуэкIэ мыхьэнэшхуэ иIащ колледжхэр зэрырагъэфIэкIуами «IэщIагъэлI ныбжьыщIэхэр», «Абилимпикс» зэхьэзэхуэхэм хуэдэхэм зэрызрагъэубгъуами. Ауэ, сыт хуэдэ зыужьыныгъэ дымыгъуэтами, гугъуехьхэр иджыри щыIэщ, абыхэм я хэкIыпIэхэр къэдгъуэ- тын хуейуэ. Мыпхуэдэ зэIущIэхэм я фIагъыу къэслъытэр щыщIэныгъэхэр ди нэкIэ зэдгъэлъагъуну Iэмал дызэриIэрщ, - жиIащ Егоровэм.
ЛъэщапIэхэм зыщаплъыхьу, студентхэмрэ егъэджакIуэхэмрэ епсэлъа нэужь, депутатхэм Къэбэрдей-Балъкъэр гуманитар-техникэ колледжым зэIущIэ щрагъэкIуэкIащ. Къардэн Мурат колледжхэм я унафэщIхэм фIыщIэ яхуищIащ, зэрырагъаджэ Iэмалхэм зэрахузэфIэкIкIэ хагъэхъуэну зэрыхущIэкъум папщIэ. Апхуэдэуи дыщIигъуащ къыщIагъэкI IэщIагъэлIхэр республикэм имыкIыу лэжьыгъэм зэрыдрагъэхьэхыну щIыкIэм зэрегупсысыпхъэр.
Емуз Нинэ гугъуехь зыбжанэ къигъэлъэгъуащ, колледжхэм я зыужьыкIэм, егъэджакIуэхэм я Iэзагъэм, щIыналъэм щрагъэкIуэкI «WorldSkills Russia» зэхыхьэм и экспертхэр зэрагъэхьэзырым епхауэ.
КъБР-м ЦIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министерствэм и къудамэм и унафэщI Мякининэ Оксанэ жиIащ я IуэхущIапIэм епха колледжи 9-м студент мини 9-м щIигъу зэрыщIэсыр, абыхэм егъэджакIуэрэ IэщIагъэм хэзыгъэгъуазэу цIыху 400-м щIигъу зэрадэлажьэр. 2020 гъэм абыхэм къыщIагъэкIащ цIыху 2172-рэ, щIагъэтIысхьар 3256-рэ мэхъу.
Къэпсэлъам зэрыжиIамкIэ, IэщIагъэ щрагъэгъуэт курыт еджапIэхэм я зыужьыныгъэм щыхьэт тохъуэ щIалэгъуалэм зэпеуэ зэмылIэужьыгъуэхэм къыщахь ехъулIэныгъэхэр.
Министерствэм и нэIэм щIэт еджапIэхэм 2020 - 2021 гъэ еджэгъуэм ныкъуэдыкъуэу, зи узыншагъэм сэкъат иIэу 100-м щIигъу щIэсщ, IэщIагъи 10-м щIигъум зыщыхуагъасэу. Колледжхэр хущIокъу зи узыншагъэм сэкъат иIэхэр я ныбжь щIалэгъуалэм яхэту щIэныгъэ зэрыратынум.
2020 гъэм Къэбэрдей-Балъкъэрым къыIэрыхьащ сом мелуани 10-м щIигъу субсидие. Ахъшэр хухахынущ 2021 - 2023 гъэхэм еджапIэ къызэгъэпэщыным. Апхуэдэуи нэгъабэ министерствэм и нэIэм щIэт еджапIэхэм папщIэ бюджет IэнатIэу 70 къызэIуахащ.
2019 гъэм республикэм и колледжищым ахъшэ саугъэт къратащ, псоми зэхэту сом мелуан 68-м щIигъу. Абы и фIыгъэкIэ зыхуей хуагъэзэфынущ гъуэгу, ухуакIуэ машинэхэм дэсхэмрэ автомобилхэр зыщIыжхэмрэ къызыщIагъэкI еджапIэхэр.
2020 гъэм и дыгъэгъазэм Къэбэрдей-Балъкъэр гуманитар-техникэ колледжым лъэщапIэу 4 къыщызэIуахащ. 2021 гъэм я мурадщ апхуэдэу иджыри 8 къызэрагъэпэщыну. ЛъэщапIэхэр иджырей IэмэпсымэхэмкIэ къызэрызэрагъэпэщыр сэбэп мэхъу экзаменыр къыщыIахкIэ студентхэм я IэкIэ ящIыфыр ягъэлъэгъуэнымкIэ.
ЗэIущIэм къыщыпсэлъащ Къэбэрдей-Балъкъэр гуманитар-техникэ колледжым и унафэщI Абазэ Барэсбий, «IэщIагъэлI ныбжьыщIэхэр» щIыналъэ зэщIэхъееныгъэм и унафэщIым и къуэдзэ КIуэкIуэ Мурат, «WorldSkills Russia» Iуэхум и къэпщытакIуэ Кузьменкэ Людмилэ, Сату-промышленнэ палатэм и унафэщI ГъукIэлI Хьэсэн, Iуащхьэмахуэ щIыналъэ колледжым и унафэщI Отаров Мухътар.
Дэтхэнэми и Iуэху еплъыкIэхэр къагъэлъэгъуа нэужь, Емуз Нинэ зэIущIэм хэтхэм фIыщIэ яхуищIащ икIи зи гугъу ящIа гугъуехьхэр икIэщIыпIэкIэ зэрагъэкIуэдыну Iэмалхэр ягъэбелджылын зэрыхуейр жиIащ.