Казбек Коков бу кюнледе 2021 жылда илмуда эм инновацияда жетишимлери ючюн жаш алимлеге КъМР-ни Башчысыны саугъасын бериуню юсюнден Указгъа къол салгъанды. Бу саугъа быйыл биринчи кере берилгенин айтырчады. Анга тийишли болгъан беш жаш алимни арасында Будайланы Хадисни жашы Алим айтылгъаны бла ёхтемленирчады. Ол Жерни юсюнден илмуну айнытыугъа къошумчулугъу ючюн белгиленнгенди.
Будайланы Алим Бийик-тау геофизика институтда булутланы физикасыны бёлюмюню булутланы микрофизика лабораториясыны кичи илму къуллукъчусуду. Аны бизге айтханына кёре, илму иши булутлада микрофизика болумланы тинтиу бла байламлыды. «Башхача айтханда, булутлада тамычыла, кристалла къалай ёсгенлерин сюземе. Ол а буз урууладан къорууланыуда жангы амалланы, реагентлени чыгъарыуда артыкъда магъаналыды»,-дегенди ол.
Алимни акъылына кёре, республиканы оноучусу жаш алимлеге аллай эс бургъаны ёсюп келген тёлюню илмугъа, тинтиулени бардырыргъа кёллендиреди. «Бу саугъа артыкъда керекди. Ол мындан ары да илмуда сайлагъан жолубузда жангы жетишимле болдурургъа, билимибизни андан ары айнытыргъа себеплик этеригине сёз да жокъду. Мен биринчилени арасында белгиленнгеними билгенимде, сейир этгенме, аны бла бирге уа бек къууаннганма»,-дегенди ол.
