КъБР-м щыIэ МВД-м щекIуэкIащ абы къыдэлажьэ Жылагъуэ советым и зи чэзу зэIущIэ. Абы щыхэплъэжащ 2018 гъэм и ещанэ мазищым кърикIуахэм.
КъБР-м къэрал кIуэцI IуэхухэмкIэ и министр, поли-цэм и генерал-лейтенант Ромашкин Игорь зэIущIэр къыщызэIуихым Советым хэтхэм фIыщIэ яхуищIащ республикэм и хабзэхъумэ IэнатIэхэм я лэжьыгъэм жыджэру зэрыхэтым папщIэ. Абы къыхигъэщащ полицэмрэ жылагъуэмрэ зэпыщIауэ зэрызэдэлажьэм и фIыгъэкIэ ОВД-хэм я IуэхущIафэхэм ятеухуауэ цIыхухэм къабгъэдэкI фIыщIэ нэхъыбэ къаIэрыхьэ зэрыхъуар.
- Жылагъуэ советым щыщхэм хэлъхьэныгъэ ин абы хуэфщIащ. Ди лэжьыгъэм жыджэру фызэрыхэтым цIыхухэм ярегъэлъагъу дэ сыт щыгъуи жы-лагъуэм папщIэ дызэрызэIухар, - жиIащ Ромашкин Игорь.
Республикэ МВД-м и деж щыIэ Жылагъуэ советым и тхьэмадэ, Урысей Федерацэм щIыхь зиIэ и артист Балъкъыз Валерэ тепсэлъыхьащ къэрал кIуэцI IуэхухэмкIэ органхэм я лэжьакIуэхэм министерствэм и жылагъуэ советхэм я лIыкIуэхэр ящIыгъуу ирагъэкIуэкIа, мыхьэнэ нэхъ зиIэу къилъытэ Iуэху зыбжанэм. Абы къызэрыхигъэщамкIэ, зриплъэж лъэхъэнэм ахэр хэтащ министерствэм иригъэкIуэкIа Iуэхугъуэ 60-м щIигъум: социальнэ Iуэхухэмрэ мыхьэнэ пыухыкIа зиIэ проектхэмрэ, КъБР-м щыIэ МВД-м и УГИБДД-мрэ УНК-мрэ ирагъэкIуэкIа профилактикэ рейдхэм, фэеплъ Iуэхухэм, щыIащ республикэм и санаторэ- курорт IуэхущIапIэхэм зыщы зыгъэпсэхухэм я деж, нэгъуэщIхэми.
«Каникулы с общественным советом» урысейпсо акцэ ирагъэкIуэкIам нэхъ зэпкърыхауэ тепсэлъыхьащ советым жэуап зыхь и секретарь ШкIэжь Ирэнэ. Республикэ МВД-м и деж щыIэ Жылагъуэ советым и жэрдэмкIэ ирагъэкIуэкIа Iуэхухэм хэтащ Къэбэрдей-Балъкъэрым и школхэм къыщызэрагъэпэщауэ щыта лагерхэмрэ санаторэхэмрэ зыщызыгъэпсэху сабий 700-м щIигъу. Гъэмахуэ лъэхъэнэм нэхъыбэу трагъэщIащ къытщIэхъуэ щIэблэм ядэлэжьэным, республикэм щыпсэу ныбжьыщIэхэм я деж хабзэхъумэ IэнатIэм и пщIэр щыIэтыным.
ЗэIущIэм хэтахэр тепсэлъыхьащ къызэгъэпэщыныгъэ Iуэху зыбжанэм, хэплъащ къапэщыт къалэнхэм.
Республикэ МВД-м и Жылагъуэ советым хэтхэм я мурадщ адэкIи щIалэгъуалэм ядэлэжьэну, хэкупсэ гъэ- сэныгъэ, зэкъуэтыныгъэ яхэлъхьэным, хабзэмрэ законымрэ тетыным гулъытэ хэха хуащIыну.