Апрельде къатыш аскер единоборствола бла кюрешген спортчуларыбыз Россейни башха-башха жыл санлада биринчиликлеринде жетишимле болдургъандыла. Алгъа Ижевскде эришиуде Аппайланы Амир (67кг.) - ючюнчю, Ахмат Макоев (70к.) экинчи жерлени алгъандыла. Кюмюш майдалы бла Ахматны къыралны жыйымдыкъ къауумуна кирирге эм дунияны биринчилигине къатышыргъа эркинлик берилгенди. Ызы бла Чебоксарыде Имран Мансуров (67кг.) эм кючлю болгъанды, Отарланы Алийхан (48кг.) а доммакъ майдал бла саугъаланнганды. Аланы тренерле Жантудууланы Азамат бла Алим Мешев юйретедиле.

Къатыш единоборстволадан регион федерация биринчиликде битеукоманда эсепде экинчи жерни алгъанды, округда эм игилени санындады.  Федерацияны келечилери, спортчула эм тренерле бла Къабарты-Малкъарны Спорт министерствосунда тюбешиу болгъанды.

Гёжефлени алгъышлай, спорт министрни орунбасары Заур Хежев алагъа  салыннганны  тамамлагъанларына ыспас этгенди.

- Республикабызда спортну бу тюрлюсюн айнытыугъа жууаплыла - къатыш аскер единоборстволадан федерацияны президенти Залим Пшуков, аны орунбасары Абайланы Артур эм тренерледиле. Спортчуларыбыз дунияны, Европаны чемпионлары болурларын тежейме, биз а ол кюнню жууукълашдырыр ючюн къолдан келгенни аярыкъ тюйюлбюз. Жарауларыгъызгъа жюрюгюз, эришиулеге къатышыгъыз, алай окъууну да унутмагъыз, тин-ниет жаны бла да айныгъыз, - дегенди Заур Мугидович.

Залим Пшуков белгилегенича, сагъынылгъан эришиуледе хорламла федерацияны, тренерлени, спортчуланы кеслерини да уллу къыйын салып кюрешгенлерини, министерствону жанындан да дайым болушлукъ болгъаныны эсебиди. «Россейни жыйымдыкъ командасына кирген спортчула жууукъ заманда аны санында биринчи юйрениу-жарау этиу жыйылыуларына барлыкъдыла. Ала жангызда единоборстволада угъай, джиу-джитсуну бразилия тюрлюсюнде да алчыла болгъанлай турадыла. Жылдан-жылгъа единоборствола бла кюрешгенлени саны ёсе барады, районлада секцияла ачыладыла. Спортчуларыбыз аслам болсала, араларында эришиулюк ёсюп, ала сынам да терк жыярыкъдыла. Къысха заманны ичинде ала дуния даражада атларын айтдырырларына ышанабыз. Энчи ыразылыгъымы уа ата-аналагъа билдирирге сюеме, ала эришиулеге биргебизге барадыла, кёл этдиредиле, ийнанадыла, аны ючюн сау болсунла», - дегенди ол.

Заур Хежев да сабийлени Ата журтну багъаларгъа, саулукълу жашау бардырыргъа, спортну сюерге, жетишимлеге итинирге юйретиуде ата-анала уллу къыйын салгъанларын, ала спорт школгъа да дайым тутхучлукъ этип тургъанларын белгилегенди. 

Залим Пшуков тренер Жантуудуланы Азаматны бла Алим Мешевни единоборстволаны айнытыугъа салгъан къыйынлары эм спортчуланы бийик даражада хазырлагъанлары ючюн федерацияны сыйлы грамоталары бла саугъалагъанды. Азамат, тренер иш бла беш жылны кюрешгенин айтып, бусагъатдагъы эсеп эм иги болгъанын билдиргенди. «Спортчуларыбыз аллай жетишимле кёргюзтюрге хазыр эдиле. Бу жол къырал биринчиликге ёталмагъан неда алчы болалмагъанланы да белгилерге сюеме, ала да кеслерин иги жанындан ачыкълаялгъандыла», - дегенди. Абайланы Артур а, умутландыргъан спортчуларыбыз кёп болгъанын чертип, аладан бютюн уллу хорламла сакъларгъа тийишлисин айтханды. 

Къатыш аскер единоборствола да республикада айнып башлагъанлы алай кёп заман болмайды, бусагъатда жаш тёлюню жанындан анга сейир уллуду. Министерство да, Заур Мугидович белгилегенича, алагъа не жаны бла да себеплик этерге хазырды.

Кульчаланы Зульфия.