Налшык дэт Лъэпкъ музеймрэ Ткаченкэ Андрей и цIэр зезыхьэ СурэтыщI гъуазджэхэмкIэ музеймрэ къыщызэIуахащ су­рэтыщI цIэрыIуэ, КъБР-м и Къэрал саугъэтым и лауреат, Къэбэрдей-Балъкъэрым щIыхь зиIэ и сурэтыщI Аккизов Екъуб и IэдакъэщIэкIхэм я гъэлъэ­гъуэныгъэ. Ар траухуащ IэщIагъэлIыр къызэралъхурэ илъэс 80 зэрырикъуам. 

Фэеплъ пшыхьым зи псалъэ щыжызыIэну хуейхэр, Екъуб и ныбжьэгъуу, и цIыхугъэу щытахэр щызэхуэсат Лъэпкъ музейм и пэшым. И гуащIэм фIыуэ щы­гъуазэхэр зэрымымащIэм и щы­хьэтт мы Iуэхум зыкърезыгъэ­хьэ­лIахэм я бжыгъэр. ЯщIэрт абыхэм ди щIыналъэм и щIыуэпс къулейр, щыпсэу лъэпкъхэм я тхы­дэр, хабзэр, цIыхухэм я даха-гъэр, нэгъуэщI Iэджи зи лэжьыгъэхэмкIэ къэзыгъэлъэгъуа Ак­кизовым куэд зэрыхузэфIэкIар. Блынхэм фIэлъ сурэтхэр и лэ­жьыгъэхэм я Iыхьэ мащIэу зэ­ры­щытыр къэплъытэмэ, Екъуб и ­гъащIэ мащIэр лъэпкъымрэ цIы­ху­бэмрэ яхуэлэжьэным щхьэу­зыхь зэрыхуищIар хьэкъ пщохъу. 
Налшыкдэсхэмрэ абы и хьэ­щIэхэмрэ я пащхьэ музеитIым къыщрахьа IэдакъэщIэкIхэр зэ­зыгъэлъагъуну хуейхэм апхуэдэ Iэмал яIэщ зы мазэ пIалъэкIэ. КъищынэмыщIауэ, Iуэхум хэтщ Аккизов Екъуб теухуа альбом дахэм и «лъэтеувэ». Тхыгъэ гъэ­щIэгъуэнхэмкIэ, сурэт телъы­джэ­хэмкIэ гъэбея къыдэкIыгъуэр тхы­лъымпIэфI дыдэкIэ тедзащ, езыр щхъуэкIэплъыкIэ дахэщи удехьэх. 
IуэхущIапIэм и унафэщI Накуэ Феликс къызэхуэсахэм фIэхъус ярихри, гъэлъэгъуэныгъэр къы­зэ­Iуихын папщIэ япэ псалъэр иритащ КъБР-м щэнхабзэмкIэ и министр Къумахуэ Мухьэдин. 
- Куэд щIауэ дгъэхьэзыр, Iэджэ щIауэ дызыпэплъэ Iуэхущ мы зэIущIэр. Дыхуейт щIэщыгъуэ ­хъунуи, ар къыдэхъулIауэ къызолъытэ, - жиIащ министрым. - Нобэ флъагъу IэдакъэщIэкIхэм яхэтщ зэи утыку кърамыхьахэр, ахэр гунэс зэрыфщыхъунум шэч къытесхьэркъым. Аккизов Екъуб ябгъэдэбгъэувэ хъунущ КIыщокъуэ Алим, Кулиев Къайсын сы­мэ, сыту жыпIэмэ ар классикщ, гъуазджэм зыми емыщхь хэлъ­хьэныгъэшхуэ хуищIащ.
КъыкIэлъыкIуэу къэпсэлъа­-пIэр хуит хуащIащ КъБР-м ЦIыху­хэм я хуитыныгъэр хъумэнымкIэ и уполномоченнэ, тхыдэ щIэныгъэхэмкIэ доктор Зумакулов Борис. Абы къыхигъэщащ Аккизовыр балъкъэрхэм япэу къахэкIа профессиональнэ сурэтыщIу зэ­рыщытыр, и лъэпкъым и тхыдэм, щIыналъэм и дахагъэм гимн пэлъытэ хуэхъуа сурэтхэр зэ­рищIар. 
- Сэ си къулыкъум къысхуигъэув къалэнукъым мыбы сы­къы­зэрыкIуар, атIэ илъэс куэдкIэ зыцIыхуауэщ, и ныбжьэгъужьу дэ­гъуэгурыкIуауэщ. Куэдрэ ды­зэхуэзащ, Iэджэрэ дызэпсэ­лъы­лIащ, дунейм ехыжыхуи дызэрыгъэпэжащ. ЦIыху нэст, цIыхуфIт, гу пцIанэт, убгъэдэсыну уасэ иIэ­тэкъым, - жиIащ Борис. - Дригушхуэрт апхуэдэ IэщIагъэлI телъыджэм дызэрыщIыгъум, а зэманым нэсу зыхэдмыщIэми. Су­рэтыщI гъуазджэм и тхыдэм ар  къы­хэнэнущ шэч хэ­мылъу. Абы  и лъэныкъуэкIэ лэ­жьыгъэшхуэ ещIэ Екъуб и ныбжьэгъуу щыта сурэтыщI цIэрыIуэ Пащты Герман. Сэ си нэгу щIэ­кIащ щIыпIэ куэдым зи гуа­щIэр къыщащIэ Аккизовым и цIэр Герман щы­лажьэ Красноярск зэ­рыщи­гъэ­лъапIэр. МыдэкIэ Екъуб и щхьэгъусэ Сиярэрэ ипхъу Има­рэрэ абы и лэжьыгъэм пащэри, узыншагъэрэ гукъыдэжрэ яIэу куэдрэ иужьым итыну си гуапэщ. 
Гъэлъэгъуэныгъэм кърит гукъыдэжым, гупсысэм тегъэщIауэ зэIущIэм къыщыпсэлъащ ­КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ. Апхуэдэуи ар къеджащ Урысейм и цIыхубэ су­рэ­тыщI, ди къэралым и Сурэ­тыщI­хэм я зэгухьэныгъэм и тхьэмадэ Ковальчук Андрей Къэбэрдей-Балъкъэрым ЩэнхабзэмкIэ и министерствэм фIыщIэ къызэ­рыхуищI тхыгъэм. Аккизовым и гъащIэмрэ и гуащIэмрэ нэхъ зыубгъуауэ къытеувыIащ Шэ­джэм районым и щIыпIэ самоуправленэм и советым и тхьэма­-дэ Уэдыхь Хьэсанш, сурэтыщI Сурхайхайнов Ибрэхьим, КъБР-м и цIыхубэ тхакIуэ Моттаевэ Светланэ сымэ. Екъуб график телъыджэти, и IэдакъэщIэкI сурэ­тышхуэхэм къадэкIуэу, тхылъ куэд и лэжьыгъэхэмкIэ игъэщIэ­рэщIащ. «Эльбрус» тхылъ те­дзапIэм щылэжьа Моттаевэм и куэдт Аккизовым хэлъа цIыхугъэм, ар гумызагъэу тхылъхэм зэрелэжьам теухуа гукъэкIыжхэр. 
Аккизовэ Имарэ псалъэ щратым, фэеплъ зэIущIэм зыкъре­зыгъэхьэлIа псоми фIыщIэ ин яхуищIащ, и адэр гуапэу зигу къэзыгъэкIыж дэтхэнэми ехъуэхъуащ. Щхьэхуэу фIыщIэ яхуи­щIащ КъБР-м щэнхабзэмкIэ и министр Къумахуэ Мухьэдин, абы и къуэдзэ Карчаевэ Iэминэ, псалъэкIи IуэхукIи зэпымыууэ щIэгъэкъуэн къыхуэхъу Пащты Герман, Екъуб и шыпхъу Чипчиковэ Мадинэ (ди жагъуэ зэры­хъунщи, дунейм ехыжащ). 
- Нобэ флъагъу гъэлъэгъуэ­ныгъэр илъэситIкIэ дгъэхьэзыращ, - жиIащ Имарэ. - Мис а зэманым къриубыдэу хузэфIэкI псори Iуэхум хилэжьыхьу къызбгъэдэта, нобэрей зэIущIэр къэхъуныр зэлъыта дэтхэнэми Тхьэм фигъэпсэу вжызоIэ. Си адэр зэрывгъэлъэпIам хуэдэу фи щхьэр лъапIэ хъуну сыхуейщ. 

Сурэтыр Къарей Элинэ трихащ.

ИСТЭПАН Залинэ.