Къабарты-Малкъарда  «Жашау журт эм шахар болум»  миллет проектге кёре   танг кесек жер игилендириледи. Аны чеклеринде  тюзюнлей къол кётюрюу бла   тапландырыллыкъ жамауат тийрелени айырыргъа онг тапдырады.  Быллай конкурс  хар инсанны оюмун билирге онг береди.   Бу жол он кюнню ичинде  анга 6 минг  адамгъа жууукъ  къатышханды. Аланы жартысы  1,5 минг чакълы волонтёрну  болушлукъларын эм башхалары да  Къырал жумушланы тамамлау сервисни хайырланнгандыла.

- Быйыл волонтёрланы магъанасы бек уллуду. Проектге къатышырча  1430 чакълы сынамлы  жаш адам айырылгъанды. Къол кётюргенлени 55 проценти аланы болушлукъларын излейдиле- дейди волонтёр араны башчысы Балаланы Салима. 

Эсге сала айтсакъ, быйыл проектге республиканы сегиз муниципалитети: Нальчик, Тырныаууаз, Терек, Чегем, Прохладный, Нарткъала шахарла эм Май район  къатышадыла.   Тёрели  конкурсда жамауат аслам хайырланнган объектле ючюн къол кётюрюрге керек болады. Быйыл республикада  аллай онсегиз объект кёргюзтюлгенди.  Аны кезиуюнде шахарларыны эм  эллерини бети айбат болурча  не этерге кереклисин  билдираллыкъдыла. Сёз  ючюн, сабийле ойнагъан, спорт, ара майданланы  эм башха жерлени сайлаяллыкъдыла. Уллу кёллюлюк этмеген жерлешлерибизни хайырындан  скверле, паркла эм башха социал магъаналы объектле  ишленедиле эм  жангыртылынадыла.

- Беш жылны ичинде «Жашау журт эм шахар болум» миллет проектге кёре, республиканы айбатландырырча иги кесек  иш этилгенин хар ким да  эслерге боллукъду.   Бу жол  къол кётюрюу башланнганда  он кюнню ичинде анга иги кесек адам къатышханы, проетни даражалыгъын ачыкълайды. Мындан арысында да шахарланы, эллени  бети иги жанына тюрленирча, жерлешлерибизни эм туристлени да къууандырырча  проектге  тири къатышырыкъбыз  деп билдиргенди КъМР-ни Къурулуш эмда  жашау журт-коммунал мюлк министри   Алим Бербеков.

Проектге онтёр жыллары толгъанла  къатышыргъа боллукъдула. Къол кётюрюрге уа 30 апрельге дери жарайды. Аны ючюн www.za.gorodsreda.ru  сайтха кирип, «Платформа голосования» бёлюмде регионну, округну неда районну табып, анда жаратхан объектни сайларгъа керекди. Аны дагъыда Къырал жумушла  порталда тамамларгъа   боллукъду. Бу ишге къатышыргъа сюйгенлеге  волонтёрла да болушурукъдула.

Чыгъарылгъан эсеплеге кёре, эм кёп къол кётюрюлген объектле экинчи жыл игилендирилирге тийишли тизмеге къошуллукъдула.