Къабарты-Малкъарда мал аурууланы жайылыуларына чек салыу, адамланы аладан къоруулау, этни къоркъуусуз болуруна контроль этиу эмда КъМР-ни Ветеринария управлениясы кёз-къулакъ болгъан башха бёлюмледе кёп тюрлю жумушланы тамамлау жаны бла бу ведомство былтыр къалай ишлегенини юсюнден сёлешгендиле аны коллегиясында.

Управленияны башчысы Аслан Арамисов айтханыча, къыралны бюджетинден ахча берилип, республикагъа керекли дарманлагъа эмда башха затла табыладыла. Аланы хайырындан силегей, къутургъан, талау дегенча къоркъуулу аурууладан сакъланыргъа къолдан келеди.

Жыл сайын жаз башында эмда кюзде бу ведомство, Табийгъат байлыкъла эмда экология министерство бла бирге, бар районлада уучу мюлклени тийрелеринде кийик жаныуарланы къутургъан ауруудан сакълагъан дарманла саладыла. Былтыр 32 мингден артыкъ жаныуаргъа берилгенди ол.

Бу ишни къыйматы иги болгъанын белгилегенди Аслан Арамисов. Сёз ючюн, 2017 жылда битеу республикада кийик жаныуарла быллай ауруугъа жукъгъан онбеш шарт болгъан эсе, 2020 жылда – 5, 2021 жылда – 2, буруннгу жылда – бир шарт тохташдырылгъанды, былтыр а бир жукъгъан хайыуан да ачыкъланмагъанды.

Къалай-алай болсада, специалистле аны бла тынчайып къалмайдыла. Жаныуарлагъа эмда къанатлылагъа эм къоркъуулу ауруула Къабарты-Малкъаргъа жетмезча кёз-къулакъ болгъан комиссия былтыр 25 кере жыйылгъанды. Ол этген оноула бары да болумну игилендириу бла байламлыдыла. Малла эмда тауукъла жайыу бла кюрешген, сора дагъыда жарашдырыучу уллу предприятиялагъа эмда элчи мюлклеге да сакъ болурча, белгиленнген жумушланы тамамлап турурча эсгертиуле этиледиле.

Аш-азыкъ рыноклада малчылыкъ продукцияны качествосуна бу Управление да къарайды. Тинтиулени кезиуюнде тууар, тауукъ, тонгуз, къоян этлени, чабакъланы, сютден жарашдырылгъан продукцияны, жумуртхаланы экспертизасы этилгенди.

Быйылгъа борчланы юслеринден айтханда, Управленияны башчысы мал аурууладан сакъланыуну эм башына салгъанды. Дагъыда республиканы ветеринария лабораториясына экинчи къауум къоркъуулугъа саналгъан микроорганизмле бла ишлерге лицензия алыргъа кереклисин билдиргенди. Специалистлени усталыкъларын ёсдюрюу, мюлк-техника онгланы игилендириу жумушла да тамам этилликдиле.

Улбашланы Мурат хазырлагъанды.