Роскадастрны Къабарты-Малкъарда бёлюмюню архивинде сакъланнган 102 мингден артыкъ документни былтыр электрон халгъа кёчюргендиле. Бу ишни анда быйыл да бардырлыкъдыла, деп билдиргендиле республиканы Жер эмда ырысхы бла байламлы халланы министерствосундан.

Цифралы архивни къураугъа бюгюнлюкде уллу эс бурулады. Ол кеси да «Национальная система пространственных данных» деген къырал программада магъаналы жерни алады. Роскадастрда айтханларына кёре, аны хайырындан тийишли законодательство игирек боллукъду, реестрден берилген жумушланы качествосу да ёсерикди.

Цифралы сервислени айнытыуну да арт кезиуде къолгъа алгъандыла. Сёз ючюн, «Госуслуги» порталда Росреестрни отуздан артыкъ тюрлю жумушун тамамларгъа боллукъду. Ол санда жеринден тепдирилмеген мюлкню юсюнден информацияны алыргъа, архивде документлени копияларын жарашдырыргъа да. Бёлюм былтыр аллай информацияны 93 процентин электрон халда жарашдырып бергенди хайырланыучулагъа. Иш алай къуралгъанын адамла жаратадыла.

Электрон архивде керек информация бек терк табылады, ол кеси да анда ышаннгылы къорууланады. «Документ «цифрагъа» кёчюрюлген эсе, аны табып, хайырланыучугъа берирге талай минут керекди. Ол къагъытда болса уа, аны биринчиден электрон халгъа кёчюрюрге тюшеди - ол а кёп заман алады», - дегенди Роскадастрны КъМР-де бёлюмюню архивини башчысы Лариса Фиронова.

Улбашланы Мурат хазырлагъанды.