«Газпром межрегионгаз Нальчик» эм «Газпром газораспределение Нальчик» компанияланы биригип ишлеген арасына быйыл 52 мингден артыкъ адам сёлешгенди. Андан билдиргенлерине кёре, кюн сайын ала бир 250 адамны жумушларына къарайдыла. Алай айны ахырына уа ол жарым мингнге окъуна жетиучюдю.

Сёлешгенлени асламысы тёлеулени юслеринден айтадыла, счётчиклерини кёргюзтюулерин билдиредиле. Дагъыда газ ызлагъа къошулур ючюн заявление берирге сюйгенле да боладыла. Печьлери, котёллары тапсыз ишлеп сёлешгенлени тарыгъыуларын а специалистле авариялы-диспетчер службагъа ашырадыла.

«Хайырланыучуланы жумушларына къарауну качествосун игилендириуге, онлайн-сервислени айнытыугъа да биз уллу эс бурабыз. Сёз ючюн, экинчисин кёпле жарата барадыла. Сагъынылгъан арагъа сёлешгенлени жумушларыны асламысын специалистлерибиз терк тындырадыла, аны себепли компанияны офислерине келип турургъа кереклиси жокъду», - дегенди аны башчысы Залим Вороков.

Улбашланы Мурат.