«Си лъахэ - си уэрэд»А фIэщыгъэм щIэту КъБР-м и цIыхубэ артист, IуэрыIуатэдж, щIэныгъэлI КъардэнгъущI Зырамыку и фэеплъу пасэрей уэрэдыжьхэм я япэ ныбжьыщIэ фестиваль мы махуэхэм Налшык щекIуэкIащ.
ЩоджэнцIыкIу Алий и цIэр зезыхьэ Къэбэрдей къэрал драмэ театрым и пэIущIэ пэшым Зырамыку и гъащIэмрэ лэжьыгъэхэмрэ ятеухуа сурэтхэм я гъэлъэгъуэныгъэ гъэщIэгъуэн щегъэувэкIат. Къэбэрдей-Балъкъэрыр къызэрызэрагъэпэщрэ илъэси 100 щрикъум ирихьэлIэу зэхаша пшыхьым ди республикэм и къалэ, къуажэ псоми къикIа, зи ныбжьыр илъэси 8 - 15-м итхэр хэтащ. ЗэIущIэм зыкърезыгъэхьэлIахэм ягу къагъэкIыжащ лъэпкъылI щэджащэ КъардэнгъущI Зырамыку и гъащIэ гъуэгуанэр, ди щэнхабзэм хуищIа хэлъхьэныгъэр. Абы зэхуихьэсыжу ди деж къэсыжа уэрэдыжьхэм я мыхьэнэм щхьэхуэу и гугъу щащIащ зэхыхьэм. КъБР-м щэнхабзэмкIэ и министр Къумахуэ Мухьэдин зэIущIэр къыщызэIуихым лъэпкъ щэнхабзэмрэ лъапIэныгъэ нэхъыщхьэхэмрэ хъума хъунымкIэ мыпхуэдэ фестивалхэм я мыхьэнэр зэрыиным тепсэлъыхьащ. - КъардэнгъущI Зырамыку и гъащIэ гъуэгуанэр ди лъэпкъ тхыдэм къыгуэхыпIэ имыIэу епхащ. ИкъукIэ си гуапэщ мы гъэм къыщыщIэдзауэ пасэрей уэрэдыжьхэм я фестивалым ныбжьыщIэхэри къызэрыхэтшэр. А цIыкIухэм уэрэдыжьхэр яхъумэу къащIэхъуэ щIэблэм Iуралъхьэжыну дащогугъ. Фестивалым хэт псоми творческэ ехъулIэныгъэ яIэну си гуапэщ, - захуигъэзащ Къумахуэм къызэхуэсахэм. Пасэрей уэрэдыжьхэм мэгъу къару зэращIэлъыр наIуэ ящыхъуат пшыхьым щIэса дэтхэнэми. Лъэпкъ тхыдэр, гупсысэр къызыхэщ уэрэдыжьхэр цIыкIу-хэм къызэрымыкIуэу дахэу ягъэзащIэрт. Макъ лъэщ, жьгъыру зиIэ ныбжьыщIэ 30-м нэблагъэм ди адэжьхэм къащIэна уэрэдыжьхэр щыжаIащ пшыхьым. КъБР-м и цIыхубэ артист Нэхущ Чэрим лъэпкъ щэнхабзэм хуищIа хэлъхьэныгъэр къалъытэри, КъардэнгъущI Зырамыку и цIэр зезыхьэ щIыхь тхылъ щыхуагъэфэщащ пшыхьым. Фестивалым хэта ныбжьыщIэхэми щIыхь тхылърэ фэеплъ саугъэтхэмрэ иратащ.
Поделиться: ЧИТАТЬ ТАКЖЕ:
|