Къабарты-Малкъарны къыраллыгъыны 100-жыллыгъына аталып  Нальчикде Жашил театрда байрам концерт болгъанды. Ингир салкъында республиканы юч махтаулу ансамбли – «Балкария»,  «Кабардинка» эм «Терк къазакъла» - тепсегендиле.

Концерт «На вершине столетия» деген ат бла хакъсыз бардырылгъанды, ариу тепсеулеге къараргъа юч мингден аслам адам жыйылгъанды, аланы араларында башха субъектледен къонакъла да болгъандыла. «Балкария» «Асланбий», «Жортууул», «Голлу», «Ындырбай», «Хардар», абезех тепсеулери бла къууандыргъанды. «Кабардинка» «Хурома», «Моздокский», къафа, «Удж хэш», «Черноморский», «Черкесское игрище» тепсеулерин кёргюзтгенди. «Терк къазакъла» уа кёл кётюрген жырларын да айта тепсегендиле.

Байрам ингир Азамат Беков бла Рената Бесланееваны республиканы бирлигине аталгъан «Кабардино-Балкария» деген жырлары бла бошалгъанды. Къараучула уа артистлеге ыразылыкъларын кёпге созулгъан къарсла бла билдиргендиле, оюмларын айта, быллай концертни эрттеден бери да сакълагъанларын белгилегендиле. Къонакъла уа тепсеулени юслери бла регионну халкъларыны маданиятларыны энтта бир кесеги бла шагъырейленнгенлерин чертгендиле.