Прохладна районда Солдатское элде сабий садикни къурулушу андан ары бардырылады. Ол 140 жерли боллукъду. Кеси да эки мекямдан къураллыкъды: бир эмда эки къатлы, кеслери да узун отоу бла бирге къошулгъан аллай, деп билдиргендиле районну жер-жерли администрациясындан.

Объектни къурулушу «Эл тийрелени комплекс халда айнытыу» деген къырал программаны чеклеринде бардырылады. Бу программа элледе жашагъанланы санын саулай къыралда жашагъанладан эм азындан 25,3 процентге жетдирирге, аланы къолайлыкъларын, жашау болумларын игилендирирге деп къуралгъанды.

Ишчиле аны биринчи этажында отоу тюплерин бетон къуюп тюзетгендиле, ич къабыргъаларын да къалагъандыла. Дагъыда терезелерини бир кесегин орнатхандыла. Шёндю уа бир къатлы мекямны башын жаба турадыла.

Ахчаны къыралны эмда республиканы бюджетлеринден бередиле. Район кесинден да къошады. Садик быйылны ахырында берилликди хайырланыугъа.