Урысей ФСИН-м и Управленэу Къэбэрдей-Балъкъэрым щыIэм хыхьэ колоние №5-м щоужьэрэкI гъавэр, хадэхэкI пасэхэр Iухыжынымрэ ахэр щIымахуэм хуэгъэтIылъынымрэ пыщIа лэжьыгъэхэм.
Колоние-псэупIэ жыхуаIэ мардэм тет мы щIыпIэм щыIэхэр щIэпхъаджагъэ хьэлъэ зымылэжьахэрщ, абы ипкъ иткIи ахэр нэхъ щхьэхуиту яIыгъщ икIи щIы Iыхьэхэр егъэбыдылIауэ хадэ, Iэщ зэрахьэ.
Мы гъэм яхуэбэгъуащ къэбыстэр, бэдрэжанхэр, жэгундэмрэ пхъымрэ. Абыхэм кърахьэлIэжыр езыхэм яшхыну зэрахурикъум къыдэкIуэу, республикэм и нэгъуэщI IуэхущIапIэхэми хурагъэшэф, я хадэхэкIхэм щыщ ди гъунэгъу щIыналъэхэми яIэрохьэ.
Тутнакъэщхэр ерыскъыхэкIхэмкIэ къызэрагъэпэщыным и закъуэкъым колонием къалэну иIэр – ар хутыкъуа, зэрымыщIэкIэ хабзэр къызэпызыуда цIыхур къызэрыгуэкI псэукIэм къыхэча мыхъунми мыхьэнэшхуэ ират колонием и унафэщIхэм.