«Маданият» миллет проектге кёре Нальчикде Жаш къараучуну театрына тынгылы ремонт этиледи. Мекямны башында къанжалларын, инженер коммуникацияларын, сантехникасын, терезелерин, эшиклерин алышхандыла, атлауучларын жангыртхандыла эм ичин, тышын да сюртгендиле. От тюшюуден сакъларча система да жангыртылгъанды. Аны бла бирге саулукълары бла байламлы чекленнген онглары болгъанлагъа тап болурча амалла да къуралгъандыла, ол санда пандус эм лифт да боллукъдула. Бюгюнлюкде театрда тийишли оборудованияны жарашдырып кюрешедиле.
Кёп болмай сагъынылгъан проектни чеклеринде Тырныауузда 1950-чи жыллада ишленнген, бусагъатда Отарланы Сейидни атын жюрютген ара бибилиотека да жангыртылгъанды. Аны ичи, тышы да сюртюлюп, омакъ болгъандыла. Жылытыучу системасын, терезелерин, эшиклерин, суу, газ быргъыларын, ток чыбыкъларын да жангыртхандыла. Жууукъ заманда жангы мебель да саллыкъдыла.
Бюгюнлюкде библиотекагъа 1500-ден аслам окъуучу жюрюйдю. Энди ол жангы излемлеге келиширча боллукъду. Ол санда 3D-техника, мультимедиа пространство эм окъуучуланы клубу да ишлерикди.
– Мекямны жангыртыргъа «Маданият» миллет проектни чеклеринде бардырылгъан «Муниципал китапханаланы жангыртыу» федерал конкурсда хорлагъаныбызны хайырындан онг табылгъанды. Бизни баш борчубуз – окъуучулагъа тап болурча, сейирлерин бурурча онгла къураргъады, ол санда гитчелеге да. Алгъын замандача, алагъа сабий абонемент да берилликди. Китапладан сора да, интерактив устройстволада ойнаргъа эм башха акциялагъа бла кружоклагъа къатышыргъа да амал тапдырыллыкъды, –дейди учрежденияны таматасы Тебердиланы Лейля.
Планнга кёре, Жаш къараучуну театры эм ара библиотека да Къабарты-Малкъарны 100-жыллыгъыны кюнюнде къууанч халда ачыллыкъдыла.
Магометланы Сулейман.
