Кёп болмай Нальчикде «Моя провинция» деген журналист фестиваль бардырылгъанды. Анга Россейни регионларындан 70-ден артыкъ адам къатышхан эди. Фестиваль бошалып, юйлерине къайтхандан сора, аланы хар бири да Къабарты-Малкъарны юсюнден кеслерини къысха эсгериулерин жазгъандыла. Аланы журналистле социальный сетьледеги аккаунтларында басмалагъандыла.

Бюгюн биз сизни Пенза шахардан келген суратчы Олег Каленинни республикабызны къонакъбайлыгъыны бла ариулугъуну юсюнден оюмлары бла шагъырей этерге сюебиз. Журналист аланы кесини «Вконтакте» социальный сетьде энчи бетинде басмалагъанды.

«Фестивальны чеклеринде бардырылгъан  «Репортаж с колёс» деген номинациясы болгъан кюн бизни, экиге бёлюп,  Къабарты-Малкъарны аламат ариу жерлерине элтгендиле. Ала  Чегем чучхурла эм Чирик кёл эдиле. Бу регионну табийгъаты болмагъанча тамашады. Мен болгъан къауум Нальчикден Чирик кёлле таба тебиреген эди. Экскурсовод Ларисадан биз болмагъанча кёп сейир хапар эшитип, ол жерлени ариулукъларын да кёрюп къайтхан эдик.

Ол жолоучулукъну юсюнден материалларыбызны басмагъа хазырларгъа уа бизни Басманы юйюне элтип, онгла къурагъанлары уа бек къууандыргъанды.

Экинчи кюн а бизни суратыбыз «Кабардино-Балкарская правда» газетни биринчи бетинде чыкъгъан эди. Тёреге кёре, суратха мен кесим алыучум себепли, кеси суратымы басмада кёргенимде сейирге окъуна къалгъан эдим.

Дагъыда тюрлю-тюрлю чыгъармачылыкъ ингирле «капустникле» да къурагъан эдиле къонакъбайла. Анга малкъарлы журналистле да къатышхан эдиле. Ала ёз тиллеринде жырла жырлагъандыла, назмула айтхандыла.

Аламат ариу Нальчик мени эсимде кёпге къаллыкъды. Мен анга:«Сау къал!» - дейме.

Басмагъа Таппасханланы Аминат хазырлагъанды.