Кёп болмай КъМКъУ-да къонакъда Шимал Осетияны къырал университетини (СОГУ) келечилери болгъандыла. Тюбешиуде эки къауум да илму жаны бла байламлыкъ жюрютюрге келишгендиле. КъМКъУ-ну ректору Юрий Альтудов, вузланы арасында шуёхлукъ эм ишчи байламлыкъ да эрттеден бери жюрютюлгенин белгилей, вузланы алимлери бирлешип ишлеселе, илмуну айнытыугъа уллу себеплик боллугъун чертгенди. Бюгюнлюкде бийик окъуу юйню илму жаны бла ёхтемленирча жетишимлери болгъанларын да билдирип, къонакъланы лабораториялагъа къараргъа, алада кёллерин салып къармашхан фахмулу алимле бла да шагъырей этерге чакъыргъанды.
Шимал Осетияны университетини ректору Алан Огоев да арада байламлыкъ жюрютюрча аслам сылтау эм амал да болгъанын айтханды.
- Биз бу жол бир къауум бёлюмню, кафедраны ишлери бла шагъырейленирге келгенбиз. Илму жаны бла не заманда да бир бирге себеплик этгенлей турабыз. Мындан арысында да тинтиу ишлени, институтланы, кафедраланы, профессураны араларында байламлыкъны кючлерге керекбиз, - дегенди Алан Урузмагович. Ызы бла СОГУ-ну президенти Ахурбек Магометов КъМКъУ-ну коллективине Владикавказны тийресинде немисли аскерни ууатханларыны юсюнден хапарлагъан китабын саугъалагъанды.
«Шимал Кавказны айнытыу корпорацияны» таматасыны кенгешчиси Нурали Резванов алгъаракълада французла бла бирге КъМКъУ-да мехатроника, робототехника эм полимерледен абериле ишлеген лабораториялада болгъанын, мында кёргенине бек бюсюрегенин айтханды. Ол жетишимли ишлер ючюн илмуну, инвесторланы эм промышленностьну арасында да байламлыкъ къурауну хайырлыгъа санагъанды. Шимал Кавказны вузлары, бирлешип, тирирек ишлеселе бек иги боллугъун да эсгертгенди.
Жыйылгъанла КъМКъУ-ну жетишимлерини юсюнден роликлеге къарагъандыла, институтланы ишлеринден да кёп затла билгендиле. Ахырында къонакъла «Полимерле бла композитле», «Мехатроника бла робототехника», «Машинала ишлеуде бийик технологияла», «Тишлеге бакъгъан эм бетге операция этген» эмда башха лабораторияланы, университетни электрон библиотекасыны эмда маданият араларыны ишлери бла шагъырейленнгендиле.